Një shtetase e cila pretendonte se quhej Bora Rasha u prezantua si motra e Klodian Rashës në protestën e ditës së djeshme. Ajo tha se kërkon drejtësi për vëllanë dhe deklaroi se në momentin që ndodhi ngjarja ka qenë në Itali, ndërsa erdhi sot për ta përcjellë për në banesën e fundit.
Sipas saj Klodiani ishte me shokët deri në orën 23:30 dhe më pas kishte shkuar të merrte një paketë, por u vra.
“Vëllai im ka shkuar me marrë paketën dhe erdhi i vdekur në shtëpi. Ka qenë deri në orën 23:30 me shokët, pastaj shkoi në shtëpi dhe tha po iki të marr paketë. Unë kam qenë në Itali kur ndodhi ngjarja dhe jam nisur dhe erdha. Familja ime kërkon të drejtën për cfarë është vrarë vëllai im. Jo, ai ka qenë shumë djalë i mirë, i rregullt, ka qenë i fejuar, sivjet po prisnim ta martonim. Kishte një vajzë nga Dibra. Për herë të fundit e takova para 6 muajsh. Më ka prekur loti në zemër. Kam edhe dy vëllezër të tjerë. Dua drejtësi për vëllanë tim, dua të di të drejtat. Vëllai ka dy shenja një në kokë dhe një në anën e zemrës. Flamurin e mbaj për gjakun e vëllait që është derdhur” tha ajo.
Mirëpo, kanë qenë familjarë të Klodjan Rashës të cilët kanë kontaktuar me Top Channel duke thënë se zonja në fjalë nuk ka të bëjë me familjen Rasha.
Mësohet se vajza është nga Saranda dhe dyshohet se ka probleme mendore. Ajo quhet Bukuroshe Haruni dhe ka folur për herë të parë për “Abc News”.
Ajo u shpreh se nuk ishte motra biologjike e Klodian Rashës, por duke se qenë se burri i saj e ka pasur shok fëmijërie dhe për shkak të marrëdhënies, e konsideronte si vëlla.
