Pas rreth 5 orësh ndjekjeje, RENEA qëlloi për vdekje 35-vjeçarin grek Kostandinos Kaçifa, në fshatin Bularat të Gjirokastrës. Policia e Shtetit njofton se, forcat RENEA vranë autorin që qëlloi me armë zjarri ndaj një patrulle të policisë.
“I bëmë thirrje të dorëzohej, por ai hapi zjarr”, thuhet në deklaratën e policisë.
Ngjarja nisi rreth orës 10:00 të kësaj të diele, kur autori filloi të gjuante me armë zjarri në ajër, duke shkaktuar panik tek banorët e zonës, të cilët ishin mbledhur në qendër për të festuar festën e Greqisë, që organizohet çdo vit.
Burime zyrtare nga policia bënë me dije se, Kaçifa pasi pa uniformat blu të afroheshin në drejtim të tij hapi zjarr me breshëri ndaj punonjësve të policisë, duke rrezikuar jetën e tyre.
Nga të shtënat nuk pati të plagosur, por vetëm dëmtim të automjetit të tyre.
Kaçifa u fut në thellësi të fshatit, ku forcat “Shqiponja” dhe efektivët e policisë vijuan kërkimin për të bërë të mundur kapjen e tij, ndërsa në ndihmë të tyre shkuan forcat speciale RENEA.
“BalkanWeb” mëson se, autori ishte fshehur pranë depos së ujit në Bularat, ndërkohë që mes tij dhe policisë pati shkëmbim zjarri.
Kaçifa jetonte në Greqi dhe prej rreth një jave kishte ardhur në Bularat. Teksa shfaqet duke pozuar me flamurin e Viorio-Epirit, duket se i riu kishte paralajmëruar ngjarjen në fjalë, ndërsa ‘kërcënonte’ me mesazhin:
“Tsipra dhe Rama bëjnë plane pa nikoqirin (pa të zotin e shtëpisë). Për një gjë të jenë të sigurt, rinia e ashpër dhe e zjarrtë e Vorio-Epirit nuk do të jetë spektatore. Janë të ftuar të gjithë grekët e Vorio-Epirit ne 28 tetor të dërgojmë një mesazh për të gjithë…Greqi ose vdekje”.
Burimi: BalkanWeb
