Ambasadori i Shqipërisë në Turqi, Kastriot Robo, ka folur në lidhje për situatën e krijuar pas tërmetit të fuqishëm që ra pak më parë, në disa qytete bregdetare, përfshirë edhe qytetin e Izmirit, ku jetojnë shumë shqiptarë.
Me anë të një prononcimi për News 24, amabasadori Kastriot Robo, tha se tërmeti ishte shumë i fortë dhe dyshohet se ka shkaktuar shumë viktima.
Kujtojmë se Izmiri është një qytet ku ka shumë shqiptarë, si dhe ka shtetas shqiptarë të cilët kanë shkuar së fundmi atje.
“Tërmeti ishte shumë i fortë, 6,6 ballë sipas ministrit të jashtëm turk. Deri më tani 6 godina janë shembur, është krijuar një situatë paniku në Izmir. Është një tërmet me të vërtetë shkatërrues.
Unë kam bërë dy komunikime me banorë në Izmir, ka hamendësime që nën rrënoja mund të ketë viktima. Me saktësi nuk e dimë, por është një qytet ku ka shumë shqiptarë, ka edhe shtetas shqiptarë të ardhur rishtazi, sëfundmi.
Jam në kontakte të vazhdueshme me ta, nuk kam një informacion të qartë. Mbani parasysh që situata është kritike. Po bëhet e pamundura që situata të përballohet”, ka deklaruar ambasadori Robo. /GazetaReforma.com/
