Deri më tani nga lëkundjet e forta të tërmetit shkatërrues që është regjistruar më 30 tetor, pranë ishujve Dodekanezë të Greqisë, të cilët janë edhe pranë Turqisë,janë regjstruar 91 viktima, ndërsa 994 persona janë plagosur. Në Greqi kanë ndërruar jetë 2 persona dhe 19 janë plagosur.
Ndërkohë, vazhdojnë kërkimet për gjetjen e personave nën rrënoja, teksa shpresat për të gjetur të mbijetur në Izmir po shuhen.
Së fundmi, Melek Taşkin Taşol kryetare e shoqatës “Shqiptarët e Bornovës” në Turqi në një intervistë për Abcnews ka treguar për momentin e parë kur dëgjoi lëkundjet e tërmetit të fuqishëm me epiqendër në detin Egje, duke e përshkruar atë moment si të tmerrshëm dhe mendimi i saj i parë ka qenë se ky ishte fundi.
Edhe pse kanë kaluar 4 ditë nga tërmeti ajo ka thënë se ende kanë frikë të qëndrojnë në banesat e tyre, të cilat kanë pësuar dëmtime të forta.
“Unë po punoja në vendin tim të punës ditën e tërmetit, u trembëm shumë dhe kishim shumë frikë se ishin shembur disa pjesë të mureve të vendit tonë të punës. Unë qëndrova në pragun e derës dhe prisja të kalonte tërmeti, por zgjati aq shumë dhe ato sekonda nuk kaluan lehtë. Mendova se gjithçka kishte mbaruar, ne jemi ende të prekur dhe nuk mund të flemë në shtëpitë tona”, shprehet ajo.
Tasol ka treguar se përveç 3 shqiptarëve që humbën jetën nga tërmeti edhe një tjetër ka marrë dëmtime të rënda.
“Për fat të mirë për mua dhe të afërmit e mi, situata është e mirë, por ne humbëm 3 shqiptarë nga tërmeti, një prej të cilëve ishte anëtar të shoqatës sonë. Dhe 1 person u plagos, ne jemi në kontakt të vazhdueshëm me të në spital dhe me shqiptarët e tjerë që pësuan dëme nga tërmeti. Ne shpesh shkojmë në zonën e rrënojave, 2 km larg nga shoqata jonë, njerëzit atje janë ende në një gjendje shumë të keqe. Ka ende nga ata që po presin që të afërmit e tyre të dalin nga rrënojat, shpresat po mbarojnë ndërsa orët kalojnë, ata qëndrojnë në parqe në një mot të ftohtë, shteti ynë, komunat tona, organizatat tona joqeveritare dhe qytetarët të gjithë po ndihmojnë në këtë situatë. Shpresojmë që Allahu të mos lejojë askënd të jetojë përsëri, ka shumë ndërtesa të dëmtuara rreth ndërtesave të shembura dhe atyre njerëzve u ndalohet të hyjnë në këto ndërtesa po qëndrojnë jashtë në çadra,”- ka treguar ajo.
Kujtojmë se 3 viktimat janë shqiptarë të Kosovës. Bëhet fjalë për një çift 70 dhe 73 vjeç, pjesë e shqiptarëve që janë zhvendosur në Turqi në vitin 1956.
Viktima e parë ishte Nazmiye Doğrayan 62-vjeçe u gjet nën rrënoja me të birin dhe fatkeqësisht nuk arriti tu mbijetonte plagëve, teksa djali i saj ndodhej në gjendje të rëndë.
