Një tërmet i fuqishëm me magnitudë 7.6 ballë ka goditur prefekturën Aomori në veri të Japonisë pas orës 23:00 të hënën, njoftoi Agjencia Meteorologjike e Japonisë. Epiqendra e tërmetit u regjistrua 80 kilometra larg bregut lindor të Aomorit, me një thellësi prej 50 kilometrash, duke shkaktuar shqetësime të mëdha në rajon. Pas goditjes, autoritetet japoneze lëshuan një paralajmërim për cunam, duke përfshirë tri prefektura: Aomori, Hokkaido dhe Iwate, me mundësinë e një vale deri në 3 metra.
Menjëherë pas tërmetit, Shërbimi Meteorologjik i Japonisë raportoi një cunam me lartësi 30-50 centimetra në disa zona të goditura, ndërsa u bë thirrje për evakuim të menjëhershëm të banorëve të zonave bregdetare dhe zhvendosjen e tyre në vende më të larta. Sipas shkallës japoneze të intensitetit të tërmeteve, kjo goditje ishte 6+. Shërbimi Gjeologjik i SHBA-së gjithashtu njoftoi se tërmeti goditi qytetin e Misawa, ndërkohë që rreth 20 minuta më vonë u regjistrua një pasgoditje me magnitudë 5.6 ballë në të njëjtën zonë detare.
Dridhjet e tokës u ndjenë edhe në kryeqytetin japonez, Tokio, dhe ndonëse Japonia është e njohur për aktivitete të shpeshta sizmike, ky tërmet ka tërhequr vëmendjen për shkak të fuqisë së tij. Vendndodhja e Japonisë, mes përplasjes së disa pllaka kontinentale dhe oqeanike, bën që vendi të regjistrojë 1,500 deri në 2,000 tërmete çdo vit. Kujtojmë se, në vitin 2011, Japonia u godit nga një nga tërmetet më të fuqishme në historinë e saj, i cili shkaktoi një cunami masiv me valë që arritën deri në 40 metra.
