Një tërmet i fuqishëm me magnitudë 7.4 ballë goditi brigjet jugore të Filipineve në orët e para të së premtes, duke shkaktuar panik, evakuime masive dhe një paralajmërim për cunami në Filipine dhe Indonezi. Tërmeti, me epiqendër pranë rajonit Mindanao, u ndje gjerësisht dhe u pasua nga tërmete të tjera më të vogla.
Autoritetet raportuan se të paktën një person ka humbur jetën dhe disa ndërtesa kanë pësuar dëme, përfshirë spitale dhe banesa në qytetin Davao dhe rrethinat e tij. Në disa zona, pacientët u trajtuan jashtë godinave spitalore nga frika e pasgoditjeve. Në qytetin Manay, një zyrtare lokale tha se studentëve të shumtë u ra të fikët nga frika, duke përshkruar ngjarjen si “të frikshme dhe tronditëse”.
Qytetet bregdetare në Filipinet jugore dhe qendrore u urdhëruan të evakuoheshin për shkak të rrezikut për valë cunami deri në një metër mbi nivelin normal të detit. Paralajmërimi theksonte se valët mund të jenë “shkatërruese dhe kërcënuese për jetën”.
Tërmeti vjen vetëm një javë pas një tjetër tërmeti të fuqishëm prej 6.9 ballësh që goditi Cebu-n, duke lënë 74 të vdekur dhe qindra të plagosur. Rreth 80,000 persona u zhvendosën si pasojë e atij tërmeti, një prej më të rëndëve në vitet e fundit në vend.
Autoritetet vijojnë vlerësimin e dëmeve ndërsa paralajmërojnë qytetarët për vigjilencë ndaj pasgoditjeve të mundshme.
