Një kompleks që përdoret nga Shtetet e Bashkuara pranë aeroportit ndërkombëtar të Bagdadit është vënë në shënjestër të një sulmi me dronë, sipas raportimeve të mediave ndërkombëtare. Autoritetet bëjnë të ditur se nuk ka persona të lënduar nga incidenti.
Droni goditi Qendrën e Mbështetjes Diplomatike, një objekt që ndodhet pranë aeroportit të kryeqytetit irakian. Sipas informacioneve paraprake, mjeti fluturues pa pilot ra pranë një kulle roje brenda kompleksit, duke shkaktuar alarm tek forcat e sigurisë që ruajnë zonën.
Raportimet tregojnë se gjithsej gjashtë dronë janë lëshuar drejt objektivit. Pesë prej tyre u neutralizuan nga sistemet e mbrojtjes përpara se të arrinin në kompleks, ndërsa njëri arriti të depërtojë dhe të bjerë pranë një pike vrojtimi. Pavarësisht këtij incidenti, nuk janë raportuar dëme të mëdha materiale apo viktima.
Sipas burimeve të sigurisë, dyshimet kryesore bien mbi grupet militante që veprojnë nën koalicionin e njohur si “Rezistenca Islamike në Irak”, të cilat konsiderohen të afërta me Iranin. Këto grupe kanë shtuar aktivitetin e tyre në javët e fundit, veçanërisht pas përshkallëzimit të tensioneve në rajon dhe operacioneve ushtarake të ndërmarra nga SHBA dhe Izraeli kundër Iranit.
Ndërkohë, edhe në veri të Irakut janë regjistruar incidente të ngjashme. Autoritetet në rajonin gjysmë-autonom të Kurdistanit raportuan se të paktën tre dronë u kapën pranë qytetit të Erbilit, pa shkaktuar viktima.
Baza ushtarake amerikane pranë aeroportit të Erbilit ka qenë në mënyrë të përsëritur objektiv i sulmeve nga milicitë pro-iraniane, të cilat e shohin praninë ushtarake amerikane në Irak si një objektiv të drejtpërdrejtë për hakmarrje.
