Një situatë e papritur ndodhi mbrëmjen e 26 shtatorit në Teatrin Kombëtar të Operas dhe Baletit, gjatë premierës së operës “La Traviata”. Sopranoja e njohur Eva Golemi, e cila luante rolin e Violetës, u rrëzua në skenë gjatë momentit kulmor të shfaqjes.
Në skenën finale, sipas libretos, personazhi i Violetës duhet të binte në krahët e Alfredos, rol i interpretuar nga tenori meksikan Mario Rojas. Por ky i fundit nuk arriti të realizonte skenën sipas parashikimit, pasi ndodhej disa metra larg, duke e lënë Golemin të përplasej në tokë.
Pas rrëzimit, stafi i TKOB reagoi menjëherë duke thirrur ambulancën. Artistja u dërgua në spital për ekzaminime mjekësore më të hollësishme. E kontaktuar nga Top Channel, Eva Golemi tha se ndodhet në gjendje të mirë, megjithëse mjekët i kanë rekomanduar 10 ditë pushim për t’u rikuperuar.
“Kam 25 vite që luaj këtë rol jo vetëm këtu, por në të gjithë botën, një incident i tillë nuk më kishte ndodhur kurrë më parë. Ngjarja mund të kishte qenë më e rëndë nëse do të dëmtoja kokën. Jam ende e tronditur nga ngjarje”, tha sopranoja që e cilësoi mungesë profesionalizmi veprimin e tenorit meksikan.
Në këtë produksion të madh, të realizuar nga mjeshtri i njohur ndërkombëtar Hugo de Ana, Golemi ishte planifikuar të performonte edhe natën finale më 29 shtator.
