Deputeti i Partisë Socialiste Erion Brace nëpërmjet një video në rrjetet sociale ka kërkuar ndërprerjen e punës në ambientet e hapura. Ai i bën thirrje qeverisë ku thotë se veçanërisht duhet ndaluar puna në sektorin e ndërtimit, gjatë orëve të pikut të temperaturave të larta, me qëllim mbrojtjen e shëndetit të punëtorëve.
“Mbroni punëtorët! Ndërpritni punën në ambient të hapur në orët e pikut të temperaturave të larta!”- shkruan Braçe në statusin e tij.
Deputeti tregon se ka vëzhguar situatën në Tiranë, ku në orën 13:00 temperaturat arrijnë në 35 gradë Celsius në termometra, ndërsa sipas ndjesisë reale ato janë 37 gradë, madje mund të shkojnë deri në 40 gradë. Në këto kushte, puna në ambient të hapur kthehet në një “cfilitje” dhe “vuajtje” për punëtorët.
“Ka mundësi që kompanitë, duke filluar nga ato të ndërtimit, të ndërpresin punën në orët e pikut të temperaturave të larta, për të mbrojtur shëndetin e punëtorëve? Në rast se ato nuk e bëjnë këtë, a ka mundësi që Ministria e Ndërtimit, Ministria e Ekonomisë dhe mbi të gjitha Ministria e Shëndetësisë të marrin këtë vendim për mbrojtjen e punëtorëve?”- vijon deputeti.
