Selena Gomez dhe Zayn Malik në një lidhje? Ky është thashethemi i fundit që ka trazuar të gjithë rrjetin. Akoma pa u konfirmuar këto zëra duket se fansat janë shumë entuziastë për këtë marrëdhënie.
Por, siç thotë edhe shprehja “ku ka zë nuk është pa gjë”. Së fundmi disa burime pranë dyshes kanë bërë me dije për mediat e huaja se Selena dhe Zayn jo vetëm janë takuar, por edhe e shijojnë shumë shoqërinë e njëri-tjetrit.
“Selena dhe Zayn janë duke u takuar,”-shtoi burimi pranë artistëve. “Ata nxjerrin më të mirën e njëri-tjetrit dhe po shijojnë vërtet kohën e kaluar bashkë.”
Kujtojmë që lajmi për lidhjen e Selena-s me Zayn erdhi pasi dyshja u parë në shoqërinë e njëri-tjetrit në një darkë në New York City.
Ky thashethem fillimisht rrodhi nga një përdoruese TikTok-u, e cila në një video të postuar në profilin e saj tregoi si shoqja e saj që punonte në një restorant të frekuentuar nga persona të famshëm kishte parë Selena-n dhe Zayn duke darkuar me njëri-tjetrin.
Vajza në fjalë tregoi gjithashtu edhe bisedën me shoqen e saj, e cila i tregonte se dy artistët kishin hyrë dorë për dore në restorant.
Këto thashetheme u zmadhuan më shumë kur u vu re se Malik së fundmi u bë një nga 403 milionë ndjekësit e Gomez në Instagram. Ndërsa ndër 18 personat që këngëtari ndjek në llogarinë e tij, një ndër to është dhe Selena.
