Mbrëmjen e sotme është nata finale e festivalit “Kënga Magjike”! Përveç performancës pa asnjë gabim LIVE në Pallatin e Koncerteve, një rëndësi të veçantë kishte edhe look-u i veçantë që artistët kishin zgjedhur për t’u paraqitur përpara publikut gjatë netëve gjysmëfinale. Pas përfundimit të fazës së parë, “iconstyle.al” realizoi një sondazh ku të gjithë lexuesit mund të vlerësonin të veshurin dhe të veshurën më bukur të “Kënga Magjike”.
Dhe më në fund kemi rezultatet!
Sipas lexuesve të “iconstyle.al”, këngëtarja e kategorisë “New Artist” Kanita është vlerësuar si e veshura më e bukur me 592 vota.
Këngëtarja kishte zgjedhur një fustan të kuq me mëngë të gjata, ku theksi ishte te dekolteja e hapur dhe e çara në anë e fustanit. Kanita kishte zgjedhur një make up shumë të lehtë, ndërsa flokët i mbante të lëshuara.
Në vend të dytë është renditur Ronela Hajati me fustanin e saj gjigand në ngjyrë të kuqe me 520 vota.
Dhe në vend të tretë Fifi, me fustanin e zi të shndërritshëm me 226 vota.
Sakaq, Mc Kresha është vlerësuar në vend të parë si këngëtari mashkull i veshur më bukur në skenën e “Kënga Magjike” me 420 vota.
Reperi kishte zgjedhur të mbante veshur pantallona në ngjyrë të zezë, këmishë dhe pardesy të së njëjtës ngjyrë. Detaji i veçantë i reperit ishte edhe çanta e shpinës që mbante gjatë performancës.
Në vend të dytë, është renditur këngëtari Flori Mumajesi me 302 vota, i cili kishte zgjedhur të dilte sa më thjesht me një bluze të zezë me detajin e ngjyrave në pjesën e krahëve.
Ndërsa në vend të tretë, është Ardit Çuni, i cili dukej shumë elegant me një kostum serioz në ngjyrë të zezë!
