Të gjithë qytetarëve të cilëve u skadon karta e identitetit dhe pasaporta këtë fundvit duhet të aplikojnë për të mos krijuar radhë të panevojshme deri në fund të vitit.
Ministri i Brendshëm Sandër Lleshaj tha se nga muaji tetor, nëse dikujt i skadon karta në dhjetor nuk do mund të udhëtojë pa pasur me vete edhe pasaportën që skadon por edhe një dokument që vërteton se ka aplikuar për një pasaportë të re.
Lleshaj tha se janë mbi 1 milion karta identiteti dhe pasaporta qytetarësh, të cilave u mbaron afati i vlefshmërisë këtë vit.
“Nga muaji tetor, nëse dikush do të tentojë të udhëtojë jashtë shtetit me një pasaportë, të cilës i mbaron afati në dhjetor, nuk do të mund të udhëtojë pa pasur bashkë me pasaportën që skadon, edhe një dokument që vërteton që ai e ka bërë aplikimin për pasaportën e re”.
Po kështu shërbimet që lidhen me kartën e identitetit, nuk do të ofrohen nëse karta nuk shoqërohet me një dokument që provon se qytetari e ka bërë aplikimin për të renë.
“E gjitha kjo bëhet për t’i kujtuar qytetarët që 31 dhjetori është afati i fundit, por nuk mund të prodhohen të gjitha kartat në datën 31 dhjetor!”, vijoi ministri.
