Të paktën 13 persona kanë mbetur të plagosur si pasojë e një sulmi brenda stacionit të metrosë së New York-ut. Paraprakisht raportohet se një person ka qëlluar në stacionin e metrosë në Bruklin, ku u gjetën edhe lëndë plasëse të pashpërthyera.
Sipas burimeve për “NBC News”, një burrë u pa duke hedhur një pajisje në stacionin e metrosë përpara se të hapte zjarr, duke qëlluar kështu pesë veta
Ngjarja e rëndë ndodhi në stacionin e metrosë në lagjen Sunset Park të Brooklyn rreth orës 8:30 të mëngjesit. Në momentin që ndodhi sulmi shumë njerëz ishin të pranishëm në stacion.
Disa nga pasagjerët e plagosur u arratisën duke u hedhur në një tren, thanë burimet.
Policia tha se sipas një raporti paraprak autori dyshohet të jetë mashkull i veshur me maskë gazi dhe jelek ngjyrë portokalli. Ai është larguar nga vendi i ngjarjes menjëherë pas sulmit.
Zyrtarët e zjarrfikësve dhe policisë nuk dhanë detaje mbi lëndimet e viktimave, por thanë se ata u transportuan në spitalet NYU Langone dhe Methodist.
Guvernatori i New York-ut, Kathy Hochul tha se ajo ishte informuar për incidentin dhe personat që do marrin vesh më shumë për ngjarjen ishin në vendngjarje. Ajo tha se do të jepen përditësime të mëtejshme ndërsa hetimi vazhdon.
Stacioni i prekur i shërben linjave të trenit D, N dhe R të qytetit. Zyrtarët e policisë dhe zjarrfikësve kanë këshilluar udhëtarët që të shmangin zonën.
