Ajo është shumë e rezervuar për jetën private. Pavarësisht se është një person publik dhe e shohim çdo javë në televizion, Alketa Vejsiu ka ditur të ruajë me fanatizëm jetën e saj private.
Mjafton të përmendim dasmën e saj që u mbajt në kushte të larta sigurie dhe ku nuk u lejua asnjë gazetar të fotografojë. Megjithatë, tani që fëmijët e saj janë rritur, Alketa e ka thyer akullin dhe ka rrëfyer disa detaje nga jeta e saj të cilat nuk i dinim më parë.
Në një intervistë në emisionin “‘Jo Vetëm Modë”, ajo foli për njohjen me partnerin në moshën 19-vjeçare dhe divorcin e prindërve:
“Televizioni është dashuria ime e madhe profesionale, por nuk ka asnjë të krahasuar me dashurinë e familjes, me atë që unë jetoj çdo ditë. Familja është ekuilibri më i madh në jetën e çdo njeriu. Ne gjithmonë e më tepër i japim hapësirë njëri¬tjetrit për të qenë të katërt bashkë. Për mua nuk ka asnjë rëndësi suksesi në televizion apo në biznes, në qoftë se fëmijët e mi nuk janë në rregull. Në përgjithësi familja ime më sheh nga ekrani. I marrin shpesh në analizë daljet e mia publike dhe më thonë gjërat e mira e gjërat që mund të bëhen më mirë. Vajzën e kam konsulente shumë të mirë sidomos. Do doja shumë që fëmijët e mi të bëhen dy njerëz të mirë, të sjellshëm dhe me këmbë në tokë. Pjesa humane është ajo që më shqetëson më tepër, aty ku fokusohet edukimi im. Pika numër dy është tekologjia. Mundohem t’i heq sa më shumë kohë të shpërdoruar me teknologjinë”, tha Alketa.
“Fati më njohu me partnerin tim në moshë shumë të re. Isha vetëm 19 vjeçe e gjysmë kur e takova, dhe ishte dashuria e jetës sime. Marrëdhënia jonë është bërë më e bukur, më e fortë dhe më interesante tani që fëmijët janë një motiv shumë i madh për të bërë projekte të bukura, për të jetuar momente të lumtura. Orët e ditës dalin për t’i bërë të gjitha, edhe për të bërë sportin, edhe për të gatuar, edhe për të shtruar darka me miqtë edhe për të udhëtuar… Të gjitha mund t’i bësh. Është vetëm çështje sistemimi dhe prioritetesh”, shtoi prezantuesja.
Prezantuesja ka treguar se ka arritur të mbajë familjen e saj gjithmonë të bashkuar në festa familjare, pavarësisht se prindërit e saj janë të divorcuar.
“Rastësisë ia kam rrëmbyer shumë oportunitete që më ka dhënë. Kam qenë me fat por edhe kam ditur t’i zgjedh gjërat. Sot nëna dhe babai im kanë një raport civil absolutisht të shkëlqyer. Takohen për fëmijët e mi. Sa herë ka festa familjare ata janë bashkë. Është një bashkëjetesë shumë e shëndetshme dhe normale, sikur ata të ishin bashkë. Edhe unë gjatë gjithë jetës jam përpjekur ta mbaj të bashkuar familjen edhe pse ata fizikisht kanë qenë larg njëri-tjetrit”, përfundoi Alketa.
