Mund të jemi renditur ndër vite si të fundit në botë, në listën e të ardhurave për frymë, lirisë së shtypit apo korrupsionit, por në momentin që u gjet një fushë ku ne shqiptarët të shkëlqejmë, edhe ajo po vyshket!
E kemi fjalën për situatën e bar-kafeneve dhe restoranteve në vend, të cilat, të prekura nga kriza ekonomike dhe të lëna pas dore nga qeveria, shumë janë mbyllur, të tjerat janë në kushte mbijetese!
Në raport me popullsinë, në 2018-n Shqipëria kishte 654 bar-kafe për 100 mijë banorë, sipas përllogaritjeve të “Monitor”, ose 1 bar kafe për 152 banorë. Ne u renditëm të parët në botë për numrin e tyre, madje ia kaluam edhe Spanjës, e cila mbante rekordin në Bashkimin Europian dhe në botë për numrin e lartë të bar-kafeve për banorë, me 592 bar kafe për 100 mijë banorë. Por pas pandemisë, duket se kjo situatë do të ndryshojë!
Po mbyllen vitrinat e qyteteve!
Ndonëse në Spanjë, bar-kafenetë janë të përhapura në zonat turistike, në Shqipëri janë në mes të qytetit dhe më shumë se gjysma e tyre në kryeqytet. Ato janë gjëja e parë që sheh në rrugë, janë vitrina e qyteteve, ndaj dhe mbyllja nga kriza ka krijuar jo vetëm një ngërç ekonomik dhe papunësi, por edhe një panoramë të trishtë.
Baret dhe restorantet ishin sektori i parë që u godit nga mbyllja e detyrueshme në mars, për të kufizuar përhapjen e koronavirusit. Të dhënat e para të INSTAT, bëjnë të ditur se për tremujorin e parë të vitit, numri i të punësuarve në këtë aktivitet ra me 21.7% dhe fondi i pagave u tkurr me rreth 20.6%, duke shënuar performancën më të keqe nga të gjithë sektorët e shërbimeve sa i takon punësimit.
3-5 biznese në ditë falimentojnë!
Në një komunikim për “iconstyle.al”, kryetari i Shoqatës së Lokaleve dhe Restoranteve, Enri Jahaj bëri me dije se, çdo ditë po mbyllen bizneset e vogla familjare, të cilët janë edhe më të prekurit pas mbylljes së detyrueshme që nga muaji mars deri në maj.
Sipas burimeve për “iconstyle.al”, 3 deri në 5 biznese në ditë po mbyllen dhe situata pritet të përshkallëzohet pasi kjo është vetëm vala e parë.
Të gjunjëzuar nga pandemia globale dhe me vendimin e nxituar të qeverisë për ndalimin e punës në këto biznese, situata duket se po përshkallëzohet drejt një krize të madhe.
Çfarë mund të bëjmë!
Kërkesat për qeverinë në këtë periudhë të vështirë, kanë qenë dhe janë ulja e TVSH-së dhe heqja e hapësirës publike deri sa të mbaroje kjo gjendje.
“Reduktim i TVSH-së në masën e hotelerisë pra 6 %, është një ndër kërkesat, pasi kjo do i jepte një shtysë sektorit dhe nuk do kishim pse të rrisnim çmimet; shtyrjen e te gjitha llojeve te taksave deri ne mars 2021; Fillimin e dhënieve të kredive te buta për kapital qarkullues pasi deri tani nuk kane filluar ende dhe hartimin e një plani strategjik për rimëkëmbjen e sektorit”, shprehet Jahaj për “iconstyle.al”.
Shtatori parashikohet të jetë vështirë pasi jo vetëm që do të ulet numri i turistëve por edhe klientët do të kursejnë e të përgatiten për muajt më të vështirë që pritet të vijnë me gripet sezonale në këtë periudhë pandemie. Kriza në këtë sektor do të vijë duke u përshkallëzuar dhe Shqipëria mund ta humbë sërish vendin e parë për të cilin mund të mburrej!
/Iconstyle.al
