Kompozitori i mirënjohur, Alfred Kaçinari, ka qenë gjithmonë i kursyer për jetën e tij private. Ndaj nuk është aspak e habitshme që vajzën e tij, Anën, ta shihnit për herë të parë në publik ditën e djeshme.
Ashtu si i vëllai Gjergji, i cili u bë një personazh i njohur për publikun kur ishte 17 vjeç pasi mori pjesë në “The Voice of Albania 1” edhe Ana ka trashëguar nga i ati talentin për muzikën, për të cilën edhe ka studiuar.
Ana Kaçinari u ftua për herë të parë në emisionin “Pasdite në Top Channel”, ndërsa tregoi për raportin e ngushtë që ka me vëllain, pavarësisht rrymave të ndryshme të muzikës që ndjekin.
Që në moshë të vogël ajo ka studiuar piano në Akademi, vazhdoi studimet pasuniversitare jashtë vendit dhe u kthye në universitetin ku studioi, por tashmë si pedagoge, ndërsa Gjergji u pasionua pas muzikës “rock”.
Të dy kujtuan kohën kur Ana i jepte mësim të vëllait, pjesë të cilën Gjergji e cilësoi si “të çuditshme”.
Ana u shpreh në emision se ndjek pothuaj çdo koncert të tij, e kritikon kur sheh se ka vend për kritika, ashtu sikurse e inkurajon në projekte të reja muzikore. Vëlla e motër tani po mendojnë për organizimin e një koncerti, që do të përfshijë muzikën klasike dhe atë “rock”.
