Kreu i “Yldon Media Group”, Ylli Ndroqi dhe bashkëshortja e tij Mimoza, kanë rezultuar së fundmi pozitivë me Covid-19.
Këtë lajm e ka bërë të ditur vetë biznesmeni, i cili në një postim në rrjete sociale ka treguar për infektimin dhe si po e luftojnë virusin.
Ndroqi ka treguar se është shtruar në terapi intensive së bashku me partneren e tij, ndërsa krahas postimit shkruan:
“Të dashur miq, për shkak të pamundësisë pë t’ju përgjigjur në angazhimet ditore dhe mesazheve të shumta si pasojë e mungesës sime dua t’ju bëj me dije se prej disa ditësh, unë dhe bashkëshortja ime jemi në trajtim intensiv të prekur të dy nga Covid-19!
Nuk është e lehtë kjo betejë, siç e dini familja ime është goditur rëndë, ndaj i jemi nënshtruar një regjimi e terapie të fortë nën kujdesin skrupuloz të mjekëve dhe infermierëve, që gjej rastin t’i falënderoj për gjithçka bëjnë në këto kohë të mbrapshta për mbarë botën. Duke ju kërkuar ndjesë për pamundësinë e përgjigjes ndaj secilit, duke ju qënë mirënjohës për mesazhet mbështetëse, duke ju kujtuar të ruani veten e të shtrenjtët tuaj se është kaq i pabesë ky virus, uroj ta kalojmë me kurajo e përkushtim këtë moment të paprecedentë në jetën tonë. Shihemi së shpejti, me respekt Ylli e Mimoza Ndroqi”
Në gusht të vitit që lamë pas, Ndroqi humbi vëllain e tij për shkak të Covid-19. Ai ishte shtruar në spitalin “Shefqet Ndroqi” dhe fatkeqësisht nuk mundi t’i mbijetonte dot virusit.
