Të hënën Tirana do të dëgjojë vetëm rock! Tre nga muzikantët më të mirë në Shqipëri, miq shumë të ngushtë njëkohësisht, pionierët e muzikës “rock”, kanë vendosur që të bashkohen për një super koncert më datë 15 maj të këtij viti në “Pallatin e Kongreseve”.
Të ftuar pasditen e sotme në emisionin e Rudina Magjistarit, Elton Deda, Aleksandër Gjoka dhe Redon Makashi kanë zbuluar disa detaje të asaj ç’ka pritet të ndezi kryeqytetin ditën e hënë.
E kush nuk do ta dëshironte një fillim-jave të tillë!
Djemtë zbuluan se orkestra që do t’i shoqërojë do të jetë e përbërë nga 70 instrumentistë, si kurrë më parë në Shqipëri. Edhe pse e kanë pranuar se çmimi i biletave është diskutuar jo pak, ata kanë deklaruar se të interesuarit i kanë blerë për vetëm dy ditë.
Nisur nga kjo, “Tre Musketierët premtojnë se, nëse ky koncert shkon ashtu si e kanë menduar ata, do të mbajnë një tjetër performance, një ditë të dytë.
Edhe pse këngët më të shumta do të jenë ato hite, të cilat kanë mbetur si të tillë për një kohë shumë të gjatë, Redon Makashi zbulon se do të këndojë për herë të parë, një këngë të re të kompozuar nga vetë ai, për t’i dhuruar kështu publikut edhe më shumë nga çfarë pritet.
Ne na mbetet vetëm të presim të hënën për të shijuar koncertin më të shumëpritur!
