Është një rregull i pashkruar se kopertinat e revistave për muajin shtator, kudo në botë, janë ndër më të rëndësishmet dhe më influencueset politikisht. Gjithashtu sjellin më shumë të ardhura!
Ky shtator do të jetë i gjithi i të famshmes ‘Vogue’ që ende pa u publikuar ka arritur të krijojë shumë ‘zhurmë’. ‘Vogue’, për herë të parë ka hyrë në tregun arab duke bërë një speciale ‘Vogue Arabia’ dhe në kopertinë ka vendosur të pozojë pikërisht modelja e njohur Bella Hadid, duke e veshur e mbuluar atë më shumë se kurrë ndonjëherë.
Fotografitë janë realizuar nga dizajnuesi dhe fotografi i njohur Karl Lagerfeld, i cili ka vendosur që ta sjellë Bella-n në një formë krejt tjetër, për të dhënë kështu një mesazh të fortë.
Publiku është ndarë në mendime: ka nga ata të cilët mendojnë se kjo është një kopertinë shumë ironike për të gjithë mendësinë arabe, ndërkohë që të tjerë mendojnë se kjo kopertinë është bërë e tillë për të treguar tolerancën e përshtatjes në kultura të ndryshme duke zbatuar normat dhe moralin e vendit .
Gjithsesi, të vërtetën mund ta tregojnë vetëm krijuesit të cilët në fakt e arritën qëllimin kryesor: të gjithë po flasin për Bella-n e veshur!
“Unë udhëtoj pothuajse tre ditë në javë. Gjithmonë porosis pulë të skuqur, se më mban si ushqim”, thotë Bella.
Duke diskutuar për mënyrën e jetesës, Bella tha: “Mendoj se nëse jep shumë në mediat sociale, gjithmonë do të kenë dëshirë për më shumë. Tani për tani, privatësia është shqetësimi im më i madh, jo vetëm për veten time, por për familjen time. Mbajtja e kufijve është gjithmonë një ide e mirë”.
Lidhur me këtë numër Lagerfeld shprehet: “Nuk vendos të jem kreativ, por është sikur të marr frymë. Shumica e gjërave që bëj, i shoh kur jam duke fjetur. Idetë më të mira janë më të shpejtat. Jo me mendje. Ideja duhet të jetë si një blic. Mund të vizatoj më shpejt se sa të flas. Nuk e ndjek kurrë instinktin tim të dytë. Nuk mendoj se mund të bësh diçka nëse vjen i dyti në radhë. Ka njerëz që kanë frikë nga faqet boshe, nga nisja e një projekti të ri, por jo unë”.
Burimi: Daily Mail
