Joe Biden fitoi 284 vota elektorale ditën e sotme duke u shpallur zyrtarisht President i SHBA-ve. Ai pati një mbështetje të gjerë popullore dhe nga shumë personazhe të njohur, që e kanë pritur me festë lajmin për fitoren e tij.
Këngëtarja me origjinë shqiptare, Bebe Rexha ka ndarë në rrjete sociale disa video nga lagja Hollywood Hills në Los Angeles, ku jetojnë personazhet e njohur. Në të dëgjohen të gjithë duke brohoritur të lumtur për fitoren e Biden.
“Ky është Hollywood Hills në këto momente! Njerëzit duke brohoritur për Biden. Los Angeles është shumë i lumtur tani”, ka shkruar Bebe.
Këngëtarja me origjinë shqiptare jeton në një qytet që është pjesë e Kalifornisë ku Biden fitoi plot 55 votat elektorale me rezultat të konsiderueshëm. Edhe vetë Bebe Rexha ka treguar se ka qenë kundër politikave të Donald Trump prej kohësh, duke qenë se ajo vjen nga një familje emigrante, ndërkohë që ish-presidenti nuk i përkrahte.
