Një 28-vjeçar masakroi për vdekje me çekiç të atin dhe më pas e hodhi në liqenin e Farkës.
Gjykata e Krimeve të Rënda ka lënë në arrest me burg Selman Aliajn, i cili ka rrëfyer se e ka goditur babanë disa herë me çekiç dhe më pas e ka fshehur në bagazhin e makinës.
“Më pas e hodha në Liqenin e Farkës dhe u largova në Kukës” ka treguar ai.
Sipas dëshmisë, i riu ka deklaruar se e qëlloi me çekiç të atin pasi ai i kishte thënë se të fejuarën e tij me të cilën pritej të martohej në janar, do ta ndanin bashkë.
“Më fejuan me zor, unë doja të ikja në Gjermani te vëllai” vijon më tej dëshmia e Selman Aliaj.
Ndërkohë avokati mbrojtës, Fran Dashi, ka kërkuar që klientit të tij t’i bëhet ekspertiza psikike, kërkesë e cila është pranuar nga gjykata.
“Është një vepër shumë e rëndë penale, duke parë edhe qëndrimin e të dyshuarit në sallën e gjyqit të krijon bindjen se medoemos avokati duhet të kërkojë një akt ekspertimi për të përcaktuar shkallën e përgjegjshmërisë së tij në momentin e kryerjes së krimit dhe cili ka qenë shkaku që e ka shtyrë drejt kryerjes së një krimi brenda familjes. Mendojmë nga eksperienca që kemi se do të ketë probleme mendore për të cilin do të jetë një akt ekpertimi i ngritur nga organi i Prokurorisë së Krimeve të Rënda, ia kërkuan ne të bëjë një akt ekspertimi me ekspertë ligjorë për të përcaktuar shkallën e përgjegjshmërisë së tij në momentin e kryerjes së krimit, duke provuar nëse janë të vërteta ato çfarë ka deklaruar në policinë e shtetit”, shprehet ai sipas Ora News.
