Të famshmit shpesh herë duken egoistë, që fshihen pas fasadës së famës dhe qëndrojnë larg problematikave që shqetësojnë njerëzit normalë. Por ka shumë prej personazheve të njohur që e shfrytëzojnë imazhin dhe pasurinë që fitojnë prej tij, për të bërë gjëra të mira për njerëzit në nevojë. Ka dhe nga ata artistë që qëllojnë në vendin dhe kohën e duhur, dhe ndihmojnë ata që kanë nevojë. “ICONstyle” ju risjell disa nga momentet kur të famshmit shqiptarë janë kthyer në heronj të jetës reale:
Gaz Paja
Ishte qershori i vitit 2016 kur aktori i teatrit shqiptar, Gaz Paja, i shpëtoi jetën një gjysheje shtëpia e së cilës ishte rrethuar nga flakët. Siç tregon ai, gjithçka ndodhi papritur, kur teksa ishte ulur në një lokal në afërsi të Brrylit në kryeqytet, dëgjoi gjyshen teksa po bërtiste “Zjarr”.
“Në atë moment pashë gjyshen në pallat. Nja 30-40 vetë po rrinin poshtë pallatit e vështronin. Nuk e imagjinova dot situatën. Nuk e di, por i kam ngjitur shkallët e pesë kateve të pallatit me një frymë. Gjeta një batanije, mora ujë dhe ia hodha përsipër një bombole gazi që po rridhte dhe kishte marrë flakë. Erdhën zjarrfikësit, por më e keqja përfundoi”, ka thënë ai.
Noizy
Ai njihet për bamirësi dhe janë të shumta rastet kur reperi shqiptar, Noizy, është hedhur direkt në veprim për të ndihmuar njerëzit në nevojë. Një rast i veçantë ishte kur një mjeke pediatre e quajtur Vera Koço, u përfshi në një aksident rrugor së bashku me familjen e saj në nëntor 2016. Aksidenti ndodhi në autostradën Tiranë- Durrës në afërsi të Maminasit, në orën 05.20, kur makina në të cilën ndodhej familja nga Durrësi, i ka rënë nga pas një kamioni. Pas aksidentit, ndihmën e parë në rrugë mësohet se mjekes ia ka dhënë këngëtari i famshëm Noizy, i cili teksa ka qenë duke kaluar aty rastësisht, ka ndalur makinën dhe ka ndihmuar të aksidentuarit. Reperi gjithashtu është bërë pjesë e fushatës për të ndërtuar shtëpi për të varfrit. Pak javë më parë ai u premtoi 3 familjeve që ndërtesat e tyre do të ndërtohen nga e para ndërsa hapi edhe një fond të veçantë prej 100.000 eurosh për njerëzit e sëmurë rëndë, që nuk kanë mundësi ekonomike të kryejnë operacione të vështira, përfshirë këtu edhe ndjekjen me kura për kancerin.
Albana Osmani
Falë nismës “Ti je një Luledielli”, Albana Osmani arriti që të mbledhë fondin e nevojshëm për t’u ardhur në ndihmë fëmijëve në nevojë që kurohen në QSUT. Në shenjë mirënjohjeje për nismën, moderatorja mori titullin ‘Ambasadore’. Kjo nismë është iniciuar nga vetë ajo ndërsa dhjetëra fëmijë të prekur nga sëmundjet e gjakut do të mund të kenë një dritë më shumë.
“Çdonjëri nga ne mund të bëjë një diferencë, por së bashku ne bëjmë ndryshimin. Faleminderit Zot! Bëre të mundur çdo gjë! Thank you God. Glory to you! Ndaj këtë akreditim me 3 mijë ambasadorë që mbështetën këtë fushatë nga e gjithë bota, duke dhënë kontributin e tyre! Ndaj në 7 pjesë këtë akreditim me grupin e vullnetarëve që janë heronjtë e këtyre javëve”, u shpreh Albana.
Stresi
I njohur si një djalë i keq dhe që është futur shpeshherë në telashe me policinë, reperi i njohur Stresi, ka vërtetuar krejtësisht të kundërtën. Ai ka bërë një gjest human pasi ndërmori një veprim të rrezikshëm duke u përpjekur të shpëtojë nga zjarri fëmijën 11 muajsh që ndodhej vetëm në shtëpi. Ngjarja ka ndodhur nëntorin e 2016-s, në një pallat në Tiranë pranë zonës së Medresesë. Foshnja ka rrezikuar seriozisht jetën si pasojë e një zjarri të rënë nga apartamentin e tij në katin e tretë të pallatit, ku fatkeqësisht prindërit e fëmijës nuk ndodheshin në atë moment në apartament. Sipas tyre, Stresi u fut nga kati i katërt në të tretin për ta shpëtuar. Ai ia doli me sukses dhe në sfond dallohen edhe duartrokitjet e dëshmitarëve.
Labinot Tahiri
Këngëtari nga Kosova u ka ardhur në ndihmë familjeve të varfra. Ai e ka treguar shpeshherë humanizmin e tij duke ndihmuar shumë familje në varfëri. Labi së fundmi ka bërë një tjetër postim në rrjetin social “Facebook”, duke iu përgjigjur të gjithëve që e pyesin se përse ai është kaq humanist: “Sepse jam shqiptar dhe jam gjak shqiptari! Ja pse jam humanist”, ka shkruar ndër të tjera Labi. Ai ka mbledhur fonde edhe për familjet e prekura nga vërshimet që ndodhën në Maqedoni, dhe në lagjen Hasan Beg në Shkup ku pas vërshimeve pati viktima edhe në njerëz.
Burimi: ICONstyle
