Kemi vetëm fatin t’i admirojmë punët e tyre, t’i shohim të demonstruara te modelet apo të famshmit, por është gati e pamundur që fustanet e dizajnuesve shqiptarë t’i kemi në gardërobën tonë.
Jo vetëm që janë shumë të kushtueshme, por një mision i vështirë për të gjetur eventin e duhur për t’i veshur. Shumë xixa, temina dhe tyl, sa do të na duhej të prisnim dasmën e vitit të ndonjë personazhi publik dhe të siguronim një ftesë.
Ato u duhen pikërisht atyre që janë në qendër të vëmendjes, që e planifikojnë axhendën për vitin që më 1 janar dhe i shohim më shumë sesa prindërit nëpër rrjetet sociale.
Por jo vetëm artistet apo moderatoret tona preferojnë të veshin fustanet e dizajnuara nga shqiptarë. Blogeret, modelet apo aktoret kanë zgjedhur që të shfaqen në tapetin e kuq dhe në evente të caktuara me veshjet që mbajnë markën “Made in Albania”, pavarësisht se ku jetojnë.
Valdrin Sahiti
Jemi kaq të njohur me stilin e tij të dizajnit sa mund të pikasnim një veshje që bën Valdrini edhe pa na e treguar kush që ka emrin e tij.
Fustani i tij lejla me dantellë dhe tyl ishte zgjedhja e modeles dhe aktores amerikane, Nicole Ari Parker. 47-vjeçarja u shfaq me fustanin e dizajnuar nga Valdrin Sahiti për të marrë pjesë në dasmën e tenistes së njohur, Serena Williams.
Kjo nuk është hera e parë që një fustan të Valdrinit e shohim të veshur nga një artiste e huaj. Më parë më 27 shkurt të këtij viti, gjatë ceremonisë së “Oscar” fustanin vezullues të tij e veshi Yvon Neojri.
Kaonë Duriqi
Fustani i Hirushes i dizajnueses së re Kaonë Duriqi u vesh nga aktorja dhe prezantuesja e njohur amerikane Nikki Novak.
Me këtë veshje kjo e fundit u paraqit në tapetin e kuq të ndarjes së çmimeve “Oscar” të këtij viti.
24-vjeçare tashmë përbën një emër me potencial të depërtojë deri në pasarelat më të njohura të modës.
Katerina Bocci
Katerina Bocci, e lindur në Shqipëri, është një dizajnuese e vlerësuar me disa çmime, e cili ka fituar mirënjohje ndërkombëtare në mesin e elitës së modës dhe të famshmeve, duke përfshirë Aretha Franklin, Fergie dhe Jordin Sparks.
Ajo ka veshur Zonjën e Parë të Miçiganit, Sue Snyder, për një event special me Zonjën e Parë Michelle Obama dhe Presidentin Barack Obama në korrik të 2012-s.
Ajo gjithashtu ka veshur disa personazhe publike në fotografitë e realizuara për revista të ndryshme.
Vjollca Llapashtica
Emri i saj është i njohur në mesin e personazheve publikë shqiptarë dhe të huaj.
Fustanet përrallore të Llapashticës janë të preferuarat e prezantueses në SHBA, Rebecca Stella dhe blogeres Liliana.
Agnesa Vuthaj
Çantat e saj janë kaq të dëshiruara nga të gjitha, ndaj nuk është aspak çudti që këngëtarja dhe prezantuesja italiane, Valeria Altobelli, mban një të tillë.
Egreis Gjergjani
Blogerja shqiptare, e cila jeton në SHBA, ka tashmë markën e saj të veshjeve për fëmijë “Itty Bitty Toes”.
Dhe është marka e zgjedhur për mbesën e Kim Kardashian, vajzën e Rob, Dream.
