Në “RTSH” së shpejti pritet që të nisë transmetimi i një emisioni të ri, “Me Bledin”, që do moderohet nga Bledi Strakosha.
Marrë shkas nga spoti, duket se ai do t’i rikthehet një formati të ngjashëm me emisionin që nisi transmetimin në 2003-shin, “Blue”, me të cilin është identifikuar gjithmonë.
Përgjatë një interviste për “Panorama Plus”, Bledi ka deklaruar ndër të tjera se “Blue” erdhi në ekran në një kohë kur mungonin thuajse krejtësisht intervistat me personazhet e njohur:
“Sot ka shumë formate që e kanë pasuar. Kështu që, në një kuptim mund ta quajmë një rikthim të ‘Blue’, në kuptimin që do të flitet për jetën, ndjesitë, të rejat, etj., por do të jetë më show dhe më argëtues, sepse jetojmë në kohë të tjera. Rëndësi për mua ka që çdo personazh i ftuar të ndihet vetvetja, ta harrojë që po xhirohet nga kamerat e po shihet nga mijëra sy dhe të flasë sa më hapur të mundet.”
Sipas Strakoshës, në emisionin e tij personazhet e famshëm do të rrëfejnë “sekretet” e tyre në ambiente të ndryshme:
“Më tej do të vijojë në restorantin, palestrën, spanë dhe në fund në dhomën e gjumit të hotelit. Të gjitha këto ambiente do të nxjerrin në pah anë disi të panjohura të personazheve.”
Po ashtu ai shtoi se të ftuar do jenë persona të rëndësishëm që rrallë janë shprehur publikisht.
