Me gjithë debatet që e rrethojnë, ky vit rezultoi më i suksesshmi për Taylor Swift-in, e cila grumbulloi të ardhurat më të larta që ka fituar ndonjëherë brenda një viti duke ia kaluar sigurisht jo vetëm vetvetes, por edhe gjithë personazheve të famshëm në botë.
185 milionë dollarë për këngëtaren vetëm vitin e kaluar, do të thotë një rritje me plot 131% nga 80 milionëshi i 2018-ës. Këto janë të dhënat e siguruara nga “Forbes”, e cila publikoi sot listën e 100 personazheve publike më të paguar të botës, ku kryeson kantautorja bjonde nga Nashville.
Kuptohet, nuk është hera e parë që Swift, një prej pop star-eve më të kërkuar dhe të diskutuar në planet, kryeson këtë listë të pamëshirshme për ne vdekatarët. Në 2017-ën ajo ishte më e paguara me 170 milionë dollarë, në sajë të fitimeve nga turi botëror “1989”.
Megjithatë, turi i saj më i fundit, “Reputation” i solli akoma më tepër të ardhura, me bileta të shitura plotësisht në 36 qytete në të katra kontinentet, duke grumbulluar në fund 345 milionë dollarë. Për të mos llogaritur pastaj se turi u transmetua në Netflix, ndërsa të ardhura të tjera marramendëse hyjnë në llogarinë bankare të Taylor Swift-it falë bashkëpunimeve për reklama me marka gjigande si Apple apo Coca Cola.
Në nëntor të vitit të kaluar, Taylor Swift ndërpreu bashkëpunimin e gjatë me kompaninë e artistëve Big Machine Label Group, për t’iu bashkuar Republic Records, pjesë e Universal Music Group. Sipas burimeve për “Forbes”, marrëveshja mund t’i ketë kushtuar Universalit 200 milion dollarë, të tjera të ardhura për këngëtaren.
Megjithatë, fakti se nuk mundi të fitonte të drejtat e pronësisë mbi tre albume të vetat, shkaktoi një reagim të ashpër nga ana e Taylor Swift-it ndaj Scooter Braun-it, i cili s’ka shumë që ka blerë shtëpinë diskografike me të cilën bashkëpunonte Swift më parë.
Në gusht, pritet publikimi i albumit të saj të ri, “Lover”, i cili siç e ka nisur, pritet të finalizojë një tjetër vit të suksesshëm për këngëtaren.
