Pandemia ka krijuar problematika të shumta dhe njëkohësisht hapësira për korrupsion e shkelje nga institucione qeveritare. Së fundmi, duket se qeveria po shfrytëzon situatën për të moskaluar bursat e studentëve. Janë jo pak por rreth 12 mijë studentë nuk kanë marr ende pagesën në vlerën e 10 mijë lekëve të reja në muaj. Viti akademik ka nisur më 2 nëntor dhe sot data shënon 6 janar por ende nuk është kryer asnjë veprim nga sekretaritë e Universiteteve.
Vetë Universitetet nuk japin asnjë informacion lidhur me këtë vonesë. “iconstyle.al” ka kontaktuar në rrugë elektronike me sekretaritë e Fakultetit të Historisë dhe Filologjisë, por nuk ka marrë asnjë informacion prej ditësh. Sakaq, në heshtje qëndron edhe Ministria e Arsimit.
Nga ana tjetër janë studentët të cilët po ashtu nuk kanë asnjë informacion se përse po bëhet kjo vonesë. Dy vitet e tjera të gjitha veprimet janë mbyllur në javën e parë të nëntorit dhe në dhjetor në llogaritë e studentëve ka kaluar pagesa e 3 muajve. Shqetësues është fakti se lista e studentëve ekselentë që përfitojnë bursën nuk ka dalë ende dhe rrjedhimisht nuk është kryer asnjë veprim prej tyre. Kjo do të thotë se në rastin më të mirë pagesa e tyre nuk mund të kalojë para muajit shkurt.
Shumë studentë mendojnë se qeveria po shfrytëzon rastin e situatës kaotike për të ndërprerë bursat e studentëve që i vendosi gjatë protestave të 2018, teksa Ministria e Arsimit ka thënë për Top Channel se paratë u janë dërguar universiteteve që në fillim të vitit akademik dhe nuk është bërë pengesë pandemia, por procesi vijon brenda Universiteteve të cilat po mbledhin dokumentacionet online.
Një studente e cila vijon studimet në Fakultetin e Historisë dhe Filologjisë për “Gazetari dhe Shkenca komunikimi” dhe duhet të përfitojë bursën ekonomike thotë për “iconstyle.al” se ka dorëzuar të gjitha dokumentet e nevojshme por nuk ka marrë asnjë lajmërim se çfarë do ndodhë me pagesën.
“Unë i kam dorëzuar letrat e nevojshme në dhjetor. Vjet i dorëzove në nëntor por për shkak të shtyrjes së fillimit të vitit akademik e mirëkuptuam këtë vonesë. Ideja është se ndonëse jemi në janar nuk kemi marrë asnjë muaj nga shuma që na takon.Pedagogët nuk kanë informacione, kurse vetë sekretaritë nuk kthejnë përgjigje.”
Çfarë vendosi qeveria më 26 dhjetor 2018!
Kujtojmë se që prej protestave studentore në 2018 në Paktin për Universitetin u parashikua granti i bursave për studentët ekselentë dhe kategorive në nevojë. Rama deklaroi askohe në një konferencë për shtyp se studentët ekselentë dhe ata në nevojë do përfitojnë arsimim falas si dhe do përfitojnë bursa mujore. Ja çfarë parashikohet në vendimin nr. 903, datë 21.12.2016 të Këshillit të Ministrave “Për përcaktimin e kritereve për përfitimin e bursave nga fondi i mbështetjes studentore për studentët e shkëlqyer, studentët që studiojnë në programe studimi në fushat prioritare dhe studentët në nevojë”, i ndryshuar;
Përkrahja:
Studentët nga familje në ndihmë ekonomike, si edhe të verbrit dhe studentët paraplegjikë e tetraplegjikë, përfitojnë financimin 100% të tarifës së regjistrimit. Studentët nga familje me ndihmë ekonomike, të verbër, paraplegjikë e tetraplegjikë përfitojnë bursë 10.000 lekë në muaj.
Ekselenca:
Studentët me notë mesatare mbi 9, në çdo program studimi, përfitojnë financimin 100% të tarifës së regjistrimit, nga tarifë e plotë që paguanin përpara këtij vendimi. Studentët me notë mesatare mbi 9, në çdo program studimi, përfitojnë bursë 10.000 lekë në muaj, ndërkohë që kjo masë ishte në nivelin 8,100 lekë dhe vetëm për studentët me mesatare 10.00.
Tarifat e studimit paguhen të plota!
E kur bursat mujore nuk kanë kaluar dhe studentët po hasin në vështirësi të shumta, e kundërta ndodh me tarifat e studimit. “iconstyle.al” prej kohësh e ka ndjekur me shqetësim këtë çështje, duke zbuluar nga rrëfimet e studentëve se tarifa po paguhet e plotë në një kohë kur as mësimin online nuk e kanë ndjekur, pasi ishte një kosto më vete, ku përmenden ofertat e internetit, wirless, etj. (KLIKO) Disa javë më parë, “Qëndresa Qytetare” ka zhvilluar një sondazh lidhur me ecurinë e mësimit online në Universitete dhe rezultatet lënë shumë për të dëshiruar, ndonëse ishin të pritshme nëse marrim parasysh faktin se atyre nuk iu është krijuar asnjë lehtësi nga shteti!
Bazuar në të dhënat e sondazhit 50.6% e studentëve shpenzojnë 20 euro në muaj për internet, 30.5% e tyre shpenzojnë 10 euro ndërsa 18.9% e studentëve shpenzojnë mbi 30 euro për të blerë internet me qëllim ndjekjen e mësimit online. Nga ana tjetër asnjë nga 9 universitet publike nuk ka bërë reduktim të tarifës së studimit pavarësisht reduktimit të kostove administrative që kanë pasur.
Studentët po shpenzojnë më shumë seç duhet dhe po marrin shumë më pak seç po shpenzojnë. Ndonëse prej fillimit të mësimit online në mars 2020 “iconstyle.al” i është bashkuar kërkesës së studentëve dhe ka kërkuar që Interneti tu jepet falas, sigurisht që qeveria nuk ka ndërmarrë asnjë veprim. E njëjta gjë vlen edhe për tarifat vjetore, që ashtu si vitin e kaluar, edhe këtë vit akademik do paguhen të plota ndonëse studentët nuk po e frekuentojnë asnjë ditë auditorin. Studentët nuk duhet të paguajnë(të plotë) tarifën vjetore.
