Ende vazhdon të jetë shqetësues pozicioni i femrave në shoqëri, me qeverinë e re të talebanëve.
Qeveria talebane në Afganistan ka nxjerrë ditën e sotme një dekret për të drejtat e grave, sipas të cilit gratë nuk duhet të konsiderohen “pronë” dhe duhet të japin pëlqimin e tyre për martesë.
Këtë lajm e kanë bërë të ditur mediat e huaja, megjithatë sërish theksojnë se ky dekret nuk përfshinte një referencë për arsimimin e grave ose aftësinë e tyre për të punuar jashtë shtëpisë.
Talebanët janë vënë nën presionin e komunitetit ndërkombëtar, i cili ka “ngrirë” shumicën e fondeve për Afganistanin, për t’u angazhuar për respektimin e të drejtave të grave që kur grupi islamik i tyre mori me forcë pushtetin në vend më 15 gusht.
“Gratë nuk janë pronë, por një qenie njerëzore fisnike dhe e lirë, askush nuk mund t’ia japë askujt në këmbim të paqes; ose përfundimit të armiqësisë”, thuhet në dekretin e talebanëve të lëshuar nga zëdhënësi Zabihullah Mujahideen.
Ky dekret përcakton rregullat që rregullojnë martesën dhe pronën për gratë, duke thënë se gratë nuk duhet të detyrohen të martohen dhe të vejat duhet të kenë një pjesë në pronën e burrit të tyre. Tashmë për martesa, do të merret parasysh edhe pëlqimi i grave.
