Të paktën dy persona kanë humbur jetën dhe të tjerë janë plagosur si pasojë e sulmeve ajrore ruse në jug të Ukrainës, konkretisht në rajonet Zaporizhia dhe Mykolaiv, sipas autoriteteve lokale.
Në rajonin e Zaporizhias, guvernatori ushtarak Ivan Fedorov njoftoi se një person u vra dhe nëntë të tjerë u plagosën gjatë një bastisjeje ajrore. “Shërbimet e emergjencës janë në vendngjarje”, shkroi ai në Telegram, duke shtuar se numri i të plagosurve mund të rritet.
Ndërkohë, në Mykolaiv, guvernatori Vitaly Kim raportoi për një viktimë tjetër pas një sulmi ndaj një ferme në komunën Chornomorska. “Një burrë u vra ndërsa punonte në fushë”, tha Kim, duke e cilësuar incidentin si “sulm të synuar ndaj civilëve”.
Situata në Ukrainë mbetet e tensionuar, ndërsa bisedimet e paqes mes Kremlinit dhe Kievit konsiderohen në “ngërç”. Rusia kërkon tërheqjen e trupave ukrainase nga zonat që ende mbahen nga Kievi në rajonin e Donetskut, kërkesë që Ukraina e ka refuzuar kategorikisht.
Ndërkohë, NATO ka nisur një operacion për forcimin e mbrojtjes së krahut lindor, pas incidenteve me dronë rusë që kanë hyrë në hapësirat ajrore të Polonisë dhe Rumanisë, duke rritur shqetësimet për përhapjen e konfliktit në territorin e vendeve anëtare të aleancës.
Forcat ruse aktualisht kontrollojnë rreth 20% të territorit ukrainas.
