Besimtarët bektashinj festojnë sot Sulltan Novruzin.
Ndonëse kjo festë i gjeti shqiptarët të izoluar në shtëpitë e tyre, secili në banesat dhe familjet e tyre, qëllimi i vetëm për të frenuar koronavirusin na bën më bashkë se kurrë.
Kryegjyshi Botëror i Bektashinjve Baba Mondi, në një intervistë për Report tv, u bëri thirrje besimtarëve bektashinj të qëndrojnë në banesat e tyre dhe të festojnë pranë familjes duke respektuar higjienën.
Ai u shpreh se do të japë një lutje të përgjithshme në orën 11:00, por pa njerëz, pas masave të ashpra të ndërmarra nga qeveria për të luftuar virusin.
“Besimtarëve u jam drejtuar me mesazhe që festën e Sulltan Novruzit ta kalojnë në shtëpitë e tyre duke respektuar të gjitha ligjet, sepse qeveria është vullneti i zotit në tokë. Të zbatohen të gjitha rregullat e higjienës dhe të jemi të kujdesshëm në veprimet që bëjmë. Nesër në 11 do të jap një lutje të përgjithshme si zakonisht, por pa njerëz, duke dëgjuar në media në shtëpitë e tyre”, tha Baba Mondi.
Baba Mondi bën thirrje për mirëkuptim nga ana e njerëzve referuar masave të marra për izolim dhe u drejton një thirrje politikanëve të qëndrojnë të bashkuar për hir të mirëqenies së popullit shqiptar.
“Masat janë shumë të rrepta dhe shumë të vështira për t’u zbatuar se njerëzit janë mësuar me rutinën e përditshme, por duhet të kuptojnë që masat janë marrë për ata, për të mbrojtur shëndetin e njeriut. U bëj thirrje jo vetëm popullit por edhe politikanëve që siç e kemi parë janë bashkuar këto ditë bashkërisht për të përballuar këtë situatë të emergjencës së lartë dhe të paparashikuar”, shprehet Baba Mondi.
Kryegjyshata botërore mori vendim që në të gjitha mjediset çdo lloj veprimtarie fetare e cila konsiston në bashkimin apo afrimin fizik të besimtarëve dhe që bie ndesh me vendimet e qeverisë shqiptare lidhur me këtë rast, të kufizohet.
/Shqiptarja.com
