Stuhitë e shiut që kanë prekur Kaliforninë jugore po pakësohen, por meteorologët paralajmërojnë se mundësia e përmbytjeve dhe rrëshqitjeve të dheut mbetet e lartë për shkak të reshjeve të mëtejshme të shiut.
Të paktën tre persona kanë humbur jetën në përmbytjet e shkaktuara nga moti ekstrem që ka përfshirë rajonin gjatë periudhës së Krishtlindjeve.
Stuhitë që kanë zgjatur deri të premten kanë sjellë më shumë se 15 cm shi në Qarkun e Los Anxhelosit dhe deri në 18 inç (rreth 45 cm) reshje në zonat malore.
Ky mot i rëndë ka shkaktuar mbylljen e rrugëve dhe evakuimin e disa zonave të rrezikuara, duke përfshirë pjesë të qytetit të Los Anxhelosit. Më shumë se 50,000 persona në shtet janë ende pa energji elektrike, dhe përpjekjet për të rivendosur shërbimin vazhdojnë.
Shërbimi Kombëtar i Motit i SHBA-së (NWS) ka paralajmëruar se rreziku për përmbytje mbetet i lartë dhe është theksuar që edhe reshjet e vogla shtesë mund të shkaktojnë më shumë probleme, sidomos në zonat malore që janë ngopur me shi gjatë javëve të fundit.
“Edhe një sasi e vogël shiu mund të shkaktojë probleme me përmbytjet, veçanërisht në malet ku disa zona kanë marrë deri në 45 cm shi që nga e marta,” tha NWS në parashikimin e saj të fundit.
Pas reshjeve të dendura, ekipet e shpëtimit kanë realizuar disa operacione shpëtimi, duke ndihmuar ata që ishin bllokuar në automjetet e tyre nga përmbytjet./TOPCHANNEL
