Një studim i fundit nga Kolegji Amerikan i Mjekësisë Sportive ka zbuluar se rutina e mëngjesit për prindërit që përpiqen të veshin dhe të përgatisin fëmijët për në shkollë është aq e lodhshme fizikisht sa barazohet me vrapimin e një maratone.
Studimi, i drejtuar nga profesori Olan Wyche, ka analizuar mbi 1,000 familje dhe ka përfunduar se energjia që shpenzohet gjatë përpjekjeve për të bindur fëmijët të zgjohen, të vishen dhe të përgatiten, arrin deri në 3,000 kalori, një sasi që zakonisht digjet gjatë një aktiviteti fizik ekstrem.
“Është një përzierje midis vrapimit të një maratone dhe përballjes me një ari të tërbuar,” shprehet me humor profesori Wyche. “Prindërit duhet të luten, të negociojnë, të kërcënojnë me dashuri dhe të bërtasin me zë të butë çdo mëngjes dhe kjo kërkon shumë energji.”
Nëse familja ka më shumë se tre fëmijë, numri i kalorive të djegura rritet ndjeshëm, duke e bërë këtë një sfidë të përditshme të vërtetë. Edhe fëmijët harxhojnë energji, përmes hedhjeve në shtrat, justifikimeve apo lotëve, por studimi tregon se prindërit janë ata që “vuajnë” më shumë.
Ekspertët rekomandojnë që prindërit të pushojnë pas një mëngjesi të tillë dhe, nëse është e mundur, të marrin një masazh për rikuperim. Sepse, siç thotë studimi, “vetëm t’i veshësh fëmijët mund të jetë sport ekstrem.”
