Njerëzit që kanë kaluar koronavirusin janë po aq të mbrojtur nga riinfektimi sa ata që kanë marrë vaksinat më të mira të Covid-19. Ky përfundim është arritur pas një studimi të kryer me 200 mijë punonjës të kujdesit shëndetësor ne Mbretërinë e Bashkuar, që është edhe një nga studimet më të mëdha në botë deri më tani.
Institucioni i shëndetit publik në Angli testoi rregullisht, nga periudha qershor-nëntor, 6 mijë punonjës të shëndetësisë që e kishin kaluar koronavirusin dhe 14 mijë që nuk ishin infektuar.
Një krahasim i infeksioneve në të dy grupet, i përshkruar në rezultatet paraprake të publikuara ditën e enjte, zbuloi se infeksioni i mëparshëm siguronte të paktën 83% mbrojtje kundër riinfektimit. Ai siguron gjithashtu mbrojtje më të lartë se 94% ndaj infeksionit simptomatik, shifër e njëjtë me ato të vaksinave më të mira të Covid-19.
Këshilltarja e lartë mjekësore, Susan Hopkins, është shprehur se është inkurajuar shumë nga fakti që infeksioni jep mbrojtje të fuqishme kundër riinfektimit, megjithëse jo të plotë, për të paktën 5 muaj.
“Infektimi natyral duket se është po aq i mirë sa një vaksinë, që është një lajm i mirë për të gjithë popullatën”, ka thënë ajo, duke shtuar se kjo rrit nivelin e imunitetit në komunitet duke zvogëluar transmetimin e infeksionit.
Por a duhet të mbajnë ende maska personat që e kanë kaluar Covid-19? Çfarë na mungon në Shqipëri?
Përderisa personat që e kanë kaluar koronavirusin janë të mbrojtur njësoj si ata që bëjnë vaksinën dhe përbëjnë një rrezikshmëri shumë të ulët për përhapjen e Covid-19, a duhet të vazhdojnë të mbajnë maska? Në vendin tonë nuk kemi ende të zgjidhur çështjen e vaksinimit siç duhet, pasi deri më tani janë siguruar shumë pak doza, që nuk janë të mjaftueshme as për personelin shëndetësor që do të vaksinohen të parët. Kështu që, duke u nisur nga kjo e mira do të ishte që të krijohej një regjistër elektronik i aksesueshëm nga të gjithë për të identifikuar personat që e kanë kaluar koronavirusin. Kjo është realizuar prej kohësh në vendet e tjera të botës, ndërsa në Shqipëri nuk është bërë e as nuk flitet për diçka të tillë.
Një regjistër elektronik do të ndihmonte forcat e rendit të mos gjobisnin më kot personat që e kanë kaluar koronavirusin dhe nuk mbajnë maska, duke qenë se nuk përbëjnë rrezik për transmetimin e virusit tek të tjerët. Gjithashtu do të lehtësonte në organizimin e fushatës së vaksinimit, se cili duhet ta marrë më shpejt vaksinën dhe cili duhet të presë radhën deri në përfundim të gjithë procesit.
