Një studente shqiptare në Kinë ka kërkuar ndihmë përmes Top Channel pasi ndodhet në rrezik për t’u prekur nga koronarovirusi.
Josilda Ndreaj kërkon që të kthehet në Shqipëri sa më parë, pasi thotë se e ka të pamundur financiarisht. Ajo studion në Wuhan, epiqendrën e koronavirusit vdekjeprurës, nga ku thotë se gjendja sa vjen dhe po përkeqësohet.
“Dua të iki sa më shpejt nga këtu. Situata sa vjen e po përkeqësohet. Vetë e kam të pamundur financiarisht të lëviz. Dua të kthehem në Shqipëri. Do t’i jem mirënjohëse qeverisë shqiptare apo gjithkujt që do të mund të më ndihmoj në këto momente të vështira ku gjendem”, ka thënë ajo në një intervistë për Top Channel.
Josilda, që studion master në Pronësi Intelektuale, thotë se ka një pasiguri të madhe në vend, por po përpiqet të ruajë qetësinë dhe të vëzhgojë situatën.
Në Kinë ndodhen rreth 400 shqiptarë, mes tyre 60 studentë dhe të tjerët mendohet se punojnë atje.
/TCH
