Ndërkohë që situata u përshkallëzua në protestën e banorëve që preken nga projekti i Unazës së Madhe, një tjetër protesta zhvillohej paralel.
Studentët kanë marshuar nga Korpusi Universitar deri para Kryeministrisë ku i parashtruan katër kërkesa kreut të qeverisë dhe Ministrisë së Arsimit që lidhen me tarifat vjetore të studimeve.
“Kërkojmë përgjysmimin e tarifave të studimit në të gjitha programet dhe nivelet e universiteteve publike. Heqjen e të gjitha detyrimeve financiare për mbrojtjen e gjuhës së huaj si kriter i nisjes dhe përfundimit të studimeve master. Heqjen e dyfishimit të tarifës për kreditë që nuk i përfundojnë në kohë studimet master”.
Klejda, studente në vitin e tretë thotë për “Ora News” se është e detyruar që çdo vit të marrë kredi konusmatore për të përballuar tarifën prej 30 mijë lekësh.
“Çdo janar ia kemi dalë me kredi konsumatore, kushte dhe libra nuk kemi”.
Studentët paralajmëruan se nëse kërkesat e tyre nuk do të përmbushen ata do të përshkallëzojnë protestat. I menjëhershëm ka qenë edhe reagimi i Ministrisë së Arsimit për të cilën tarifat nuk kanë pësuar rritje prej 4 vitesh, teksa theksoi se tarifat vendosen nga Universitetet dhe jo nga qeveria.
Kërkesa e studentëve:
- Përgjysmimin e tarifave në të gjitha degët dhe nivelet e studimeve
- Heqjen e barrës financiare për certifikimin e gjuhës së huaj
- Heqjen e pagesës dyfish për kreditet nga provimet e mbartura
- Të mos zhvendosen studentët e Fakultetit të Gjeologjisë dhe Minierave nga godina aktuale, ku mendohet të ndërtohet Gjykata e Lartë
Pas protestës do të dorëzojnë një peticion me mijëra firma të mbledhura duke i kërkuar qeverisë heqjen e diskriminimit ekonomik.
/Ora News
