Shumë shpejt jo çdo student që përfundon shkollën e mesme do të ketë të drejtën që të hyjë në universitet. Qeveria shqiptare vendos një kusht që lidhet me mesataren, për të gjitha ata nxënës që synojnë shkollën e lartë.
Ata që e kanë mesataren e shkollës së mesme nën notën 6 nuk do t’u jepet mundësia të shkojnë në universitet.
Kështu tha kryeministri Edi Rama gjatë prezantimit të Bibliotekës Dixhitale Universitare, ndërsa theksoi se do të ketë një ndërhyrje në legjislacion.
“Do të bëjmë disa ndryshime radikale, do ndërhyjmë në legjislacion. Nuk mundet që të ketë në universitet studentë me mesatare të shkollës së mesme nën notën 6. Pra universiteti nuk mund të jetë një portë e hapur për cilindo. Do të vendosen kritere të qarta pranimi në universitetet tona”, tha Rama.
Ai nuk dha ndonjë afat se kur do të aplikohet ky kriter.
