Vetëm 3 ditë para nisjes së vitit të ri akademik, Komiteti Ekspertëve vendosi që mësimi në të gjithë universitetet e vendit të zhvillohet online. Ky vendim i vonuar solli revoltim të studentëve, të cilët ditën e sotme janë ngritur në protestë.
Studentët pretendojnë se jo të gjithë kanë mundësi të sigurojnë pajisje teknologjike për zhvillimin e mësimit online dhe kanë kërkuar rikthimin në auditorë, të paktën për seminaret. Një pjesë e tyre janë mbledhur për të protestuar tek Ministra e Arsimit, një pjesë tek Kryeministria dhe disa të tjerë tek Ministria e Shëndetësisë.
Një përfaqësi e këtyre të fundit kanë hyrë në ambientet e Ministrisë së Shëndetësisë dhe kanë dorëzuar një listë me disa kërkesa:
- Mësimi i alternuar mes online dhe auditoreve, leksionet online, seminaret në auditore
- Rimbursimi i pagesës së konvikteve dhe qerave
- Paketat e internetit falas dhe të dedikuara për studentët
- Mundësim i pajisjeve teknologjike të nevojshme për studentët që nuk kanë akses në mësimin online
Ndërkohë studentët janë përplasur edhe me policinë, sipas të cilëve nuk lejohen grumbullimet për shkak të pandemisë.
Vendimi i vonuar për mësimin online me pasoja të mëdha për studentët
Duke qenë se studentët kanë bërtitur me të madhe vështirësitë që hasën nga marsi në korrik për mësimin online, Ministria e Arsimit në këto muaj duhet të kishte punuar e të ishte angazhuar në zgjidhjen e këtij problemi, pasi situata ishte më se e qartë. “iconstyle.al” prej muajsh ka trumpetuar faktin se situata e rënduar do i kthente sërish studentët dhe nxënësit tek Google Classroom dhe Google Meet, por qeveria si duket nuk e paska menduar këtë skenar, pasi si gjithmonë është e vonuar. (Kliko këtu)
Ky vendim është shoqëruar me pasoja të mëdha tek studentët, sidomos tek ata që vijnë nga rrethet, sepse kanë paguar tarifën e qëndrimit në konvikt apo kanë marrë shtëpi me qira në Tiranë. Në adresë të “iconstyle.al” kanë ardhur qindra mesazhe nga ana e studentëve, të cilët shprehen se kanë paguar konviktin apo shtëpitë me qira për disa muaj dhe askush nuk e di nëse paratë e tyre do ju kthehen mbrapsht përderisa do të qëndrojnë e studiojnë në banesat e tyre.
