Nga sot studentët e Fakultetit të Juridikut, që duan t’i rikthehen mësimit, mund të vazhdojnë procesin mësimor normalisht.
Mësimi do të nisë nga sot në orën 14:00 në ambientet e gjimnazit “Petro Nini Luarasi”.
Kërkesa erdhi nga vetë studentët, të cilët dëshironin që mësimi të niste normalisht, duke u distancuar nga ata që vazhdojnë bojkotin prej dhjetorit të vitit të kaluar.
Studentët janë shprehur se çdo godinë është njësoj për ta, mjafton që të bëhet mësim.
“Çdo orë e humbur është shumë dhe është shumë e rëndësishme të bëjmë mësim, qoftë dhe në gjimnaze. E rëndësishme është që të fillojë mësimi për ne, pastaj besoj se do të hapet shkolla dhe ne për pak ditë mund të jemi atje”, janë shprehur studentët për mediat.
Por ata që vazhdojnë protestën nuk e shohin si zgjidhje vijimin e mësimit në një tjetër godinë, pasi sipas tyre pjesa më e madhe e studentëve vazhdojnë bojkotin.
