Nëse ke sadopak njohuri për modën, me siguri ke dëgjuar se një fustan i vogël i zi është domosdoshmëri për garderobën e çdo femre. Epo vitet e fundit të njëjtën rëndësi ka marrë edhe fustani i vogël i bardhë, që prej kohësh është shndërruar në një must-have sidomos në sezonin veror. Ndaj nëse nuk e keni ende një të tillë në dollapin tuaj, nxitoni ta gjeni dhe fashionista Sara Kolami do t’ju udhëzojë si të krijoni me të tre kombinime fanstastike.
Kombinimi 1
Jepini gjallëri pamjes suaj duke i shtuar ngjyra të forta dhe të gjithë sytë do të jenë mbi ju.
Sara ka zgjedhur një palë sandale çiklaminë lustrafin dhe një çantë blu të po të njëjtit tonalitet për një pamje bohemiane.
Kombinimi 2
Shndërrohuni në një çapkëne të vërtetë dhe në vend të sandaleve apo balerinave, kombinojeni fustanin tuaj të vogël të bardhë me një palë atlete stil Vans.
Për t’u dukur edhe më “cool”, mos ngurroni të luani me aksesorë të ndryshëm si rripat me perçina apo syzet stil “Matrix” që së fundmi po bëjnë namin mes fashionistave.
Kombinimi 3
Zgjoni rrokeren bohemiane brenda jush dhe fustanin tuaj të vogël të bardhë visheni me çizmet tuaja të shkurtra të preferuara.
Sara sugjeron çizmet me perçina për një kontrast edhe më të fortë stilesh, një çantë të strukturuar dhe syze me ngjyrë.
