Albërije Hadërgjonaj ka qenë një ndër këngëtaret që ka dënuar ashpër reagimin e Elisa Spiropalit për teatrin kombëtar dhe artistët kundër shembjes së tyre, të cilët i quajti trushpëlarë.
Në një postim në Instastory, të cilin e ka fshirë tashmë, Albërija e quan injorante Spiropalin dhe i kërkon që të ngrejë zërin për të drejtat e tyre.
“Po ik moj injorante Elisa Spiropali. U bëre ti të tregosh për artistat që kanë dhënë shpirt në atë teatër. Ik shko rri me kalamajt e tu, se për atë punë je. Mos u merr me kollosat e artit. Në vend të ngresh zërin për të drejtat e artistëve, ti han m… për artistat“, ka shkruar Alëbërija.
Por çfarë tha Elisa Spiropali dje në Kuvend? Ajo u shpreh pro prishjes së Teatrit dhe ndërtimit të një godine të re dhe të fortë.
“Teatri Kombëtar i Shqipërisë, do të ngrihet aty, më i fortë dhe më i bukur se kurrë. Nuk kemi patur Teatër moj zonjë (i drejtohet Rudina Hajdarit), kanë qenë ca trushplarë e jo artistë. Shumica e aktorëve që kanë dhënë shpirtin në atë skenë do vazhdojnë ta japin në mënyrë dinjitoze. Ata duan të bëjnë pazar për veten e tyre, për sistemin, ju doni të mbijetoni në politikë, po në të njëjtën mënyrë. Unë dua që ju dhe të gjithë të mbijetoni dhe të keni sukses të madh në politikë. Për këtë nuk e fajin maxhoranca, e kanë fajin ata që ju nxorrën këtu. Gjejeni aty problemin”, është shprehur Spiropali.
Në replikë, Rudina Hajdari reagoi duke i thënë Spiropalit: “T’ju vijë turp që ofendoni artistët e Shqipërisë, nuk e dija që je arkitekte të na tregosh si ndërtohet. Teatri ka një shpirt që duhet të ruhet. Ju lutem mos ofendoni artistët. Të isha në vendin tuaj do të tërhiqja atë fjalë. Sa i përket sistemit, a e kuptoni që këtu ju keni sjellë kriminelë?”.
Pasi këshilli i Ministrave vendosi që godina e Teatrit Kombëtar të kalojë në pronësi të Bashkisë së Tiranës, presidenti Ilir Meta çoi çështjen në Gjykatë Kushtetuese, duke thënë se teatri është pronë e Republikës së Shqipërisë.
