Gjithçka duket se është gati për miqësoren Shqipëri-Itali.
Me shumë mungesa nga dëmtimet dhe mos lejimi i lojtarëve nga klubet respektive, trajneri Edi Reja ka zhvilluar seancën e fundit përpara ndeshjes me Italinë.
Duke u mbështetur në skemën 3-5-2 trajneri reja do të hedhë në fushë lojtarët më të mirë të Shqipërisë, ata që janë sprovuar edhe më parë. Kjo për faktin se përballë kombëtares së shtetit të tij, trajneri do të kërkojë të bëjë rezultat. Berisha në portë, në mbrojtje do të jenë Ismajli, Kumbulla dhe Mihaj. Krahët e mesfushës mbulohen nga Hysaj dhe Lenjani ndërsa në qendër Abrashi, Bare dhe Nedim Bajrami. Sulmi i është besuar Brojës dhe Uzunit.
Nga ana tjetër Roberto Mancini do të paraqitet fillimisht me rreshtimin 3-4-3, për ta përshtatur më pas sipas situatave të lojës. Donnaruma në portë. Në mbrojtje Scalvini, Bonucci dhe Bastoni. Në mesfushë Di Lorenzo, Verratti, Tonali dhe Dimarco, Zaniolo, Raspadori dhe Grifo do të jenë në sulm.
Edhe Italia do të kërkojë fitore në këtë ndeshje.
Gjithashtu, Policia ka njoftuar planin e masave për miqësoren mes Shqipërisë dhe Italisë që do të zhvillohet pasditen e sotme në stadiumin “Air Albania”.
Në kuadër të masave për mbarëvajtjen e ndeshjes nga ora 18:00 do të bllokohen disa akse rrugore, konkretisht rruga “Lekë Dukagjini”, përreth stadiumit; rruga “Dervish Hima”; rruga “Gjergj Filipi”; rruga “Papa Gjon Pali II”, nga kryqëzimi me rrugën “Ismail Qemali” deri tek stadiumi “Air Albania” dhe bulevardi “Dëshmorët e Kombit”.
“Policia e Tiranës kërkon mirëkuptimin e tifozerive respektive, për zbatimin e detyrimeve të mësipërme, si dhe mirëkuptimin e qytetarëve për të evituar lëvizjen me automjete, në segmentet rrugore të lartpërmendura, nga ora 18:00 deri në përfundim të aktivitetit”, thuhet në njoftimin e policisë.
Njoftimi i Policisë:
Policia e Tiranës, plan masash për ruajtjen e rendit dhe sigurisë, para, gjatë dhe pas zhvillimit të ndeshjes miqësore të futbollit midis Shqipërisë dhe Italisë, ndeshje e cila do të zhvillohet ditën e sotme, më datë 16.11.2022, në orën 20:45, në stadiumin “Air Albania”.
Masat e marra nga Policia e Tiranës përfshijnë jo vetëm ambientet e stadiumit, por edhe perimetrin jashtë tij.
Në këtë kuadër do të ketë bllokime të disa segmenteve rrugore gjatë kalimit të tifozëve, nga ora 18:00 deri në përfundim të aktivitetit, konkretisht do të bllokohen:
– rruga “Lekë Dukagjini”, përreth stadiumit; rruga “Dervish Hima”; rruga “Gjergj Filipi”; rruga “Papa Gjon Pali II”, nga kryqëzimi me rrugën “Ismail Qemali” deri tek stadiumi “Air Albania” dhe bulevardi “Dëshmorët e Kombit”
Sheshi “Nënë Tereza” nuk do të ketë bllokime të lëvizjes.
Policia do të garantojë lëvizjen e tifozëve përgjatë rrugëkalimeve të përcaktuara dhe nuk do të lejojë grumbullim apo kalim të tifozëve jashtë itinerarit të caktuar.
Policia e Tiranës kërkon mirëkuptimin e tifozerive respektive, për zbatimin e detyrimeve të mësipërme, si dhe mirëkuptimin e qytetarëve për të evituar lëvizjen me automjete, në segmentet rrugore të lartpërmendura, nga ora 18:00 deri në përfundim të aktivitetit.
Po në zbatim të planit të masave, do të ushtrohen kontrolle ndaj tifozëve, para hyrjes në stadium, për sende të kundërligjshme (si armë, sende të forta, bidonë uji, çadra, çelësa metalikë, lëndë piroteknike etj). Çdo tifoz duhet të jetë i pajisur me dokument identifikimi
Nuk do të lejohen të futen në stadium, persona të papajisur me dokument identifikimi, si dhe fëmijët nën moshën 16 vjeç, të pashoqëruar nga prindi apo kujdestari.
Gjithashtu, nuk do të lejohen të futen në stadium tifozët, që në aktivitete të mëparshme sportive, janë të identifikuar nga Policia, si problematikë.
Policia e Tiranës apelon edhe njëherë për tifozëritë e të dyja skuadrave, që të zbatojnë rregullat dhe ligjin.
