Sot është dita e shqiptarëve në futboll! Shqipëria kuq e zi luan në mbrëmje një nga përballjet më të shumëpritura ndër vite ndaj Italisë fqinje.
Kjo është sfidë e rëndësishme për të dyja skuadrat në rrugën për kualifikim të Eliminatoreve të Botërorit “Rusi 2018”. Italia në një formë të mirë kërkon fitoren me çdo kusht për të ruajtur hapin e Spanjës kryesuese në “Grupin G” me 10 pikë, që ndeshet me Izraelin e vendit të tretë në orën 20:45 të mbrëmjes.
Në konferencën për shtyp që i paraprin ndeshjes së sotme me Italinë, trajneri De Biazi tha se, do të ishte shumë i lumtur nëse arrihet një rezultat pozitiv ndaj azurrëve në Stadiumin “Renzo Barbera” të Palermos.
Shqipëria pritet të zbresë në fushë me formacionin: në portë Strakosha, në mbrojtje Ajeti, Kukeli, Veseli, Hysaj, Agolli. Në mesfushë Basha, Memushaj Roshi e Lilaj, ndërsa në sulm i vetëm do të jetë Cikalleshi.
Ky është takimi i dytë mes dy vendeve pas miqësores së luajtur në Genova më 18 nëntorit 2014, dhe që u fitua nga vendasit 1-0.
Për kombëtaren italiane Palermo konsiderohet si qytet me fat pasi në të numërohen 13 takime të luajtura me një bilanc 11 fitore, 1 barazim dhe një humbje.
Kuqezinjtë spektakël në rrugët e Palermos
Qindra tifozë pushtuan rrugët e Palermos në Itali, në pritje të përballjes së kuqezinjve me kombëtaren italiane. Gjatë vizitës së delegacionit shqiptar në Piana degli Albanesi, fëmijët arbëreshë emocionuan të gjithë të pranishmit duke kënduar në shqip. Nën udhëheqjen e mësueses së gjuhës shqipe, ata kënduan këngën e njohur arbëreshe “Moj e bukura more”.
