Nisi dje në Rusi Kampionati Botëror i Futbollit, për hapjen e të cilit ishte zgjedhur të performonte këngëtari Robbie Williams me sopranon e njohur ruse, Aida Garifullina, të ndjekur nga 500 kërcimtarë.
Ndërsa ndeshja hapëse Rusi-Arabia Saudite përfundoi dje me rezultatin 5-0, pritet që 32 skuadrat të përballen në fushë me njëra-tjetrën për një muaj rresht, për të shpallur fituesin më 15 korrik.
Vendi mikpritës është Rusia, e cila ka organizuar deri në detaj turneun ndërkombëtar të futbollit që mbahet çdo 4 vite.
Pavarësisht se e ndiqni apo jo futbollin, keni apo jo informacione për të, të gjithë kemi një skuadër apo një shtet më përzemër. “Iconstyle.al” vendosi që të krijonte ditën e djeshme me hapjen e Kupës së Botës, një sondazh për të votuar skuadrën e zemrës.
Dhe skuadra më e dashur për shqiptarët është… Gjermania.
92 votues zgjodhën skuadrën gjermane si më të preferuarën. Në fakt Gjermani hynë në listën e shteteve më të fuqishme dhe pretendente për të fituar Kupën e Botës në futboll. Në Botërorin e mbajtur 4 vite më parë ishte pikërisht skuadra gjermane që arriti të merrte titullin kampion, por jo për herë të parë. Ajo është shpallur kampione në vitet, 1990, 1974 dhe 1954.
Skuadra e dytë më e preferuar për votuesit e “iconstyle.al” është Brazili, me 87 vota. Brazili është shpallur fitues i Kupës së Botës në vitet 1958, 1962, 1970, 1994 dhe 2002.
Në vend të tretë renditet Spanja (59 vota), Argjentina (45 vota), Portugalia (17 vota).
