14 shtatori riktheu në banka 480 mijë nxënës në gjithë territorin e vendit, por në kushte krejtësisht të tjera. Përveç librave e mjeteve të tjera shkollore, në çantat e çdo nxënësi këtë vit kishte nga një maskë dhe dezinfektues për t’u mbrojtur nga koronavirusi.
Para nisjes së shkollës, Ministria e Shëndetësisë hartoi dhe publikoi një udhëzues, në bazë të të cilit duhet të veprojnë nxënës e mësues deri në fund të vitit shkollor. Ishte ky udhëzues që detyroi nxënësit të mbanin patjetër maskë në shkollë dhe caktonte se të gjithë duhet të ruanin distancën prej më shumë se 1.5 metra me njëri-tjetrin. Gjithashtu në të caktohej se çdo nxënësi i duhej matur temperatura para se të hynin në shkollë dhe se duhej të plotësonin një formular vetëdeklarimi për të treguar nëse janë të prekur vetë ata apo ndonjë i afërm i tyre nga Covid-19.
Megjithëse këto rregulla duhej të zbatoheshin një për një, në disa shkolla është vënë re se nuk ka ndodhur diçka e tillë, për shkak të mungesës së termometrit, dezinfektuesve apo mosrespektimit të distancës fizike. Nga ana tjetër në media është thënë se në disa institucione arsimore ka pasur mësues të prekur me Covid-19 dhe prandaj ka mungesë të theksuar stafi.
Megjithatë ne kemi krijuar sondazhin më poshtë, për të pasur një pasqyrë më të qartë rreth situatës, se sa respektohen rregullat e vendosura dhe sa i vështirë ka qenë rikthimi në shkollë për nxënësit pas disa muajsh mësimi online.
