“Nëse virusi do të përhapet ne do të zhvillojmë mësimin online”!
Kështu është shprehur Zamira Gjini, Drejtoresha e Përgjithshme e Politikave të Arsimit në MASR në një lidhje me Skype me edicionin e lajmeve në Report Tv , ku a folur për nisjen e vitit të ri shkollor.
Ndonëse mësimi online është mundësia e vetme që të mos kemi përhapje të infektimeve, ai është parashikuar si një mundësi e fundit pas rritjes së shifrave. Pra çështja që shtrojmë është: A nuk do të ishte më mirë t’i paraprinim rritjen e këtyre shifrave të infektimeve?
Ndërkohë që Maqedonia e Veriut apo Greqia kanë shtyrë afatin e hapjes së shkollave (lexo këtu), Shqipëria po tregohet e nxituar në këtë drejtim, që pritet të sjellë rritje të infektimeve, në një kohë që nuk kemi as kushtet për ta përballuar. Ndonëse mbajtja mbyllur e shkollave nuk ishte opsion, mësimi online ishte, të paktën deri sa të bëheshin vaksinat për gripet sezonale.
Edhe në udhëzuesin e publikuar pak ditë më parë, thuhej se mësimi zhvillohet vetëm në distancë, në rast se situata e COVID-19 përkeqësohet shumë në nivel kombëtar, në nivel lokal ose në nivel shkolle.
“Në këtë skenar shkolla do të hartojë orarin e shkollës për mësimin në distancë. Për të lehtësuar punën e mësuesit, në komunikimin online, klasat me numër të madh nxënësish mund të ndahen me grupe ose mund të realizohet mësimi me të gjithë klasën nëse platforma online e krijon këtë mundësi. Ora e mësimit do të jetë 25 minuta”, vijon më tej udhëzimi.
Nëse mësimi do të zhvillohet online, gjë që besohet se do të ndodhë shumë shpejt, atëherë mësuesit duhet të ishin trajnuar për këtë pjesë. Ministria duhet të kishte përgatitur tashmë një platformë e re online që do lehtësojë krijimin e klasave virtuale.
Buxhet për të paguar orët shtesë të mësuesve
Duke folur për hapjen e shkollave, Gjini tha se në vend janë 32 shkolla me mbi 1 mijë nxënës dhe 50 me 800 nxënës, në të cilat do të veprohet me dy turne duke u respektuar të gjitha masat që nga matja e temperaturës në hyrje, mbajtja e maskës apo mbajtja e distancës.
“Nëse kemi nxënës mbi 20, klasat do të ndahen. E rëndësishme është që nxënësit do vendosen në klasë do respektojnë protokollin. Ndarja e klasave rrit ngarkesën e mësuesve. Për këtë ministria e arsimit ka një buxhet për të paguar orët shtesë. Po u kërkua edhe mësues shtesë do ketë. Janë përcaktuar qartë detyrat. Shërbimi psiko-social do të dyfishohet në këtë proces mësimor të vështirë. Ne në Shqipëri kemi rreth 32 shkolla që kanë mbi 1 mijë nxënës dhe 50 shkolla që kanë mbi 800 nxënës, por janë marrë masat që të bëhen dy turne sipas një orari të vendosur nga drejtoria e shkollës. Edhe nxënësit që shkollat e tyre janë prekur nga tërmeti do shkojnë në një shkollë tjetër ku mësimi do bëhet me dy turne. Ne do të sigurojmë të gjitha mjetet mbrojtëse”, tha Gjini.
Në lidhje me dezninfektimin e shkollave që të jenë gati për fillimin e mësimit ajo tha se shumica kanë përfunduar por ende po punohet. Kujtojmë se viti i ri shkollor do të fillojë në datën 14 shtator 2020 në masa shumë të rrepta për të parandaluar përhapjen e pandemisë së COVID-19.
/Iconstyle.al
