Emisioni “Stop” zbuloi mbrëmjen e sotme se të rinjve në Tiranë, u shitet në dorë ketamikë, një lloj droge e fortë që përdoret tek kafshët. Në investigimin e emisionit, burrë dhe grua, Telha Kokunja dhe Shpresa Kokunja, të cilët kishin në pronësi një farmani veterinare në Shkozë, shfaqen duke u shitur të rinjve drogën, të cilën e pranon se përdoret tek kafshët.
Mjeku veteriner Martin Toro, sqaroi për emisionin “Stop” se ketaminën mund ta marrin vetëm veterinerët me licencë.
“Është një medikament që përdoret vetëm për anestezi të përgjithshme te kafshët, te qentë dhe të macet. Ne i përdorim vetëm për ndërhyrjet kirurgjikale”, u shpreh mjeku veteriner.
Ndërkohë që mjekja toksikologe Sonila Bitri, tregon se kjo substancë jep varësi, çka nuk dihet nga përdoruesit, ndaj dhe abuzohet me të.
“Ketamina është anestetik me veti haluçinogjene dhe disicioative. Përdoret në mjekësinë veterinere për qëllimin anestetik, ndërsa te njerëzit, te adoleshentët kryesisht, abuzohet për efektet haluçinogjene, psikoaktive që kjo substancë ka. Shpesh herë për fat të keq përzihet dhe me cigare dhe kanabis. Efektet kryesore janë në sistemin nervor qendror, por jo vetëm. Jep ndjesinë e shkëputjes nga trupi dhe realiteti dhe kanë probleme me memorjen, probleme të rënda mendore, haluçinacione, probleme me orientimin e humorin. Jep çrregullime me ritmin e tensionin, probleme me frymëmarrjen dhe për fat të keq në doza të larta edhe në fatalitet”, tha toksikologja.
Pas denoncimit në emisionion “Stop”, policia e Tiranës kanë arrestuar në flagrancë Telha Kokunja 52 vjeç dhe Shpresa Kokunja 49 vjeç, të cilët kanë në pronësi një farmaci veterinare në Shkozë.
Gjatë kontrollit në farmacinë e tyre, Policia e Tiranës arrestoi edhe 18-vjeçarin me iniciale A.B., i cili u kap në flagrancë duke blerë një shishe ketaminë. Në total u sekuestruan 30 shishe ketaminë.
