Gjatë mbrëmjes së djeshme (15 Prill) mbërriti në Portin e Durrësit anija më e madhe që ka shkarkuar në një port shqiptar, cisterna e naftës Perseus Star 116000 dwt dhe 15 metra zhytje.
Anija e ngarkuar me naftë të përpunuar në Portin Sikka në Indi shkarkon në terminalin MBM në Porto Romano. Shkarkimi realizohet për herë të parë në largësi 1.5 milje nga bregu dhe thellësinë 20 metra nëpërmjet tubave të shtrira nga bregu deri te anija, e cila qëndron në det e lidhur në 6 bova (sistemi multi boy moring), aplikuar për herë të parë në Adriatik.
Anija 250 metra e gjatë dhe 44 metra e gjerë mban flamurin Marshall Islands po ajo që ka nxitur më shumë kureshtjen është arsyeja se përse kjo anije vjen pikërisht në këtë periudhë, në nisje të fushatës zgjedhore.
A është kjo lëvizje e Qeverisë për të shërbyer si stok për uljen e çmimit të naftës? Kjo duket se po, pavarësisht se lufta në Ukrainë është drejt fundit e pasojat nuk janë më si më parë.
Edhe pse Shqipëria është një vend prodhues i naftës dhe në të kaluarën arrinte të përpunonte një pjesë të saj në vend, kohët e fundit abuzimi dhe keqmenaxhimi i këtij sektori ka sjellë, që sot vendi të varet krejtësisht nga importi; si në këtë rast me naftën nga India, duke e blerë në vende importuese.
E në këtë formë, nafta do mbetet stok në kohë fushate, duke u përdorur si një nga “premtimet” e Qeverisë për uljen e çmimit të naftës.
