Kanë kaluar dy vite që kur i mituri Ardit Gjoklaj u gjet i pajetë në landifillin e Sharrës në Tiranë dhe askush nuk ka marrë përgjegjësi për këtë ngjarje të dhimbshme.
17-vjeçari nga Tropoja u gjet i pajetë në gusht të vitit 2016-të. Në fillim u tha se ai ishte vrarë dhe transportuar në landfill, por më pas u zbulua e vërteta. I mituri punonte në mënyrë të jashtëligjshme në landfill, nën moshë dhe pa asnjë siguri për jetën.
Për vrasjen që u quajt “aksidentale” u akuzuan dy persona, që në thelb duket se nuk e nxjerrin në dritë përgjegjësin e vërtetë për ndarjen nga jeta të Arditit.
Shoferi i fadromës së firmës që grumbullonte mbeturinat, Edmond Kollari, dhe përgjegjësi i turnit të firmës, Dëfrim Hakrama, u akuzuan si përgjegjës për vdekjen e Arditit, por u shpallën të pafajshëm më pas, pasi sipas Gjykatës së Tiranës, nuk ka prova të mjaftueshme për vrasjen e 17-vjeçarit.
Ndërkohë pak kohë pasi gjykata shpalli të pafajshëm dy të akuzuarit, prokuroria ka apeluar vendimin, duke kërkuar fajësi për ta. Çështja në fakt po zvarritet shumë duke lënë pa përgjigje shumë pyetje që vërtet janë shqetësuese.
Ardian Gjoklaj, vëllai i madh i Arditit
Arditi mbante veshur uniformën e punëtorëve të kompanisë, “3R” sh.p.k, që ushtronte aktivitetin e përpunimit dhe riciklimit të mbetjeve në bazë të një aktmarrëveshjeje me Bashkinë Tiranë. Atëherë si ishte punësuar një 17-vjeçar në një subjekt ku mungonin kushtet e sigurisë?
Si e ushtronte veprimtarinë “e ligjshme” ky subjekt kur një numër i madh punonjësish ishin rekrutuar në të zezë dhe sipas “BIRN”, nuk ishin të pajisur as me libreza pune dhe as me libreza të sigurimeve shoqërore, siç ishte premtuar nga Bashkia?
Impianti i riciklimit i kompanisë “3 R” në Sharrë
Kush mbante përgjegjësi për ata dhjetëra fëmijë, burra dhe gra-pjesa më e madhe e të cilëve nga komuniteti rom, që punonin në kushte çnjerëzore dhe në mungesë të mjeteve mbrojtëse në mes të plehrave? Ku duhet të nisë të zbatohet drejtësia?
E sigurt që këto pyetje nuk e gjejnë zgjidhjen me një kërkesë prokurorie për të dënuar, shoferin e firmës dhe përgjegjësin e turnit, të cilët mbeten hallka e fundit e këtij zinxhiri pikëpyetjesh.
