Të gjithë mjekët e urgjencës pranë QSUT-së kanë dhënë dorëheqjen nga vendi i tyre i punës. Kjo dorëheqje kolektive i është komunikuar edhe ministres së shëndetësisë Ogerta Manastirliu, Kryeministrit Edi Rama dhe Presidentit Ilir Meta.
Arsyet e tyre të dorëheqjes mjekët i kanë shkruar në një letër që e kanë firmosur të gjithë. Sipas stafit të mjekëve të urgjencës është e pamundur vazhdimësia e punës për shkak të mungesës së kushteve të punës dhe pacientëve të shumtë.
“Tërhiqemi nga pozicioni i punës. Ka mbingarkesë me të shtruar të sëmurë, si dhe nuk ka kushte pune për stafin mjekësor. Ndërkohë, shërbimet e tjera nuk zbatojnë urdhrat”, kanë shkruar mjekët në letrën e tyre.
Stafi i mjekëve të QSUT-së ka paralajmëruar organet kompetente para 30 ditëve për këtë dorëheqje masive të tyre.
