Një skandal ka tronditur futbollin në Luksemburg, pasi Federata e Futbollit e këtij vendi ka vendosur të shkarkojë nga detyra trajnerin e kombëtares së vajzave, Daniel Santos, pas akuzave për ngacmim seksual.
Vendimi është bërë publik këtë të enjte përmes një komunikate zyrtare, ku bëhet e ditur se trajneri 44-vjeçar, i cili drejtonte ekipin kombëtar që prej vitit 2020, largohet menjëherë nga posti i tij. Santos kishte qenë më parë edhe trajner i ekipeve të të rinjve në vitet 2019 dhe 2020.
Sipas federatës, ndaj tij janë paraqitur disa denoncime, ku përmenden mesazhe të papërshtatshme që dyshohet se ai i kishte dërguar disa prej lojtareve të kombëtares. Këto raportime kanë ngritur shqetësime serioze brenda institucionit që drejton futbollin në vend.
Në reagimin zyrtar, Federata e Futbollit të Luksemburgut thekson se një sjellje e tillë bie ndesh me standardet etike dhe me parimet e respektit që kërkohen në ambientin sportiv.
“Një sjellje e tillë është në kundërshtim me vlerat etike dhe me respektin që kërkohet nga federata,” thuhet ndër të tjera në komunikatë. Institucioni shton se ka vepruar pa hezitim për të mbrojtur lojtaret dhe integritetin e sportit.
Federata thekson gjithashtu se dëshmitë e mbledhura, së bashku me humbjen e qartë të besimit nga ana e lojtareve, e kanë bërë të pamundur vazhdimin e bashkëpunimit me trajnerin.
