Një ngjarje shqetësuese ka ndodhur në Disneyland Paris, ku një burrë 22-vjeçar nga Mbretëria e Bashkuar është arrestuar pasi dyshohet se organizoi një “martesë” të inskenuar me një vajzë 9-vjeçare ukrainase. Ceremonia u zhvillua më 21 qershor, përpara Kështjellës së Bukuroshes së Fjetur, në një ambient të marrë me qira ekskluzivisht për këtë ngjarje.
Sipas autoriteteve franceze, “dasma” përfshinte rreth 100 figurantë të punësuar posaçërisht, të cilët u sollën me autobus dhe besonin se po merrnin pjesë në një ngjarje të vërtetë. Dyshohet se skenari ishte menduar si material për rrjetet sociale, megjithëse motivet e plota mbeten nën hetim.
Alarmi u dha nga stafi i sigurisë së parkut, të cilët vunë re moshën shumë të re të “nuses”, e veshur me fustan nusërie dhe taka të larta. Policia ndërhyri menjëherë dhe ngjarja u anulua në vendngjarje.
Zyra e prokurorisë konfirmoi se fëmija i është nënshtruar një ekzaminimi mjekësor dhe nuk ka shenja dhune apo abuzimi. Nëna 41-vjeçare e vajzës, së bashku me një 55-vjeçar letonez, janë liruar pas marrjes në pyetje, ndërsa i riu britanik dhe një tjetër letonez 24-vjeçar po mbahen nën akuza për mashtrim dhe pastrim të mundshëm parash.
Zëvendësprokurori Alexandre Verney deklaroi se “ngjarja ishte tërësisht e inskenuar dhe nuk kishte karakter ligjor. Të ftuarit ishin aktorë dhe gjithçka ishte planifikuar për qëllime mediatike”.
Ndërkohë, vetë Disneyland Paris ka bërë kallëzim zyrtar dhe ka theksuar se ngjarja u ndërpre sapo u identifikuan parregullsitë. “Kur kuptuam se nusja ishte fëmijë, çdo gjë u ndërpre menjëherë,” thanë përfaqësuesit e parkut.
